އިންޑިއާއިން ރާއްޖެއަށް ވެދެމުންދާ އެހީތަކަކީ، ސީދާ ދިވެހި ރައްޔިތުންގެ ކުރިއެރުމާއި ތަރައްޤީއަށް ވެދެމުންގެންދާ އެހީތަކެއް ކަމަށް ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ މިކަމުގެ ސާފު ހެކިތައް މިއަދުވެސް ރާއްޖެއިން ފެންނަން އެބަހުރި ކަމަށެވެ. "އެގޮތުން ބަލާއިރު، އިންދިރާގާނދީ މެމޯރިއަލް ހޮސްޕިޓަލް ކަމަށްވިޔަސް، ރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހޮސްޕިޓޭލިޓީ އެންޑް ޓުއަރިޒަމް ސްޓަޑީޒް ކަމަށްވިޔަސް، އަދި 34 ރަށުގެ ފެނާއި ނަރުދަމާއާއި، ތިލަމާލެ ބްރިޖާއި، ގަން އިންޓަރނޭޝަނަލް އެއަރޕޯޓް ތަރައްޤީ ކުރުމާއި، ހަނިމާދޫ އިންޓަރނޭޝަނަލް އެއަރޕޯޓާއި، އައްޑޫ މަގުތައް ހެދުމާއި، ބިން ހިއްކުމާއި، ކޯސްޓްގާޑް ބިލްޑިންގއާއި، ތިލަފަޅުގައި ކޯސްޓްގާޑަށް ބިނާކުރެވޭ ފުރިހަމަ ފެސިލިޓީއާއި، މި ކަންތައްތަކަކީ އިންޑިއާގެ ހިލޭ އެހީއާއި، ލޯނު އެހީގެ ދަށުން ރާއްޖޭގެ ތަރައްޤީއަށްޓަކައި ހިންގާ ބޮޑެތި ޕްރޮޖެކްޓްތައް،" ރައީސް ވިދާޅުވިއެވެ.
އެމަނިކުފާނު ވިދާޅުވީ އިންޑިއާއިން ދިވެހީންނަށް ވަމުންދާ އެހީތެރިކަމަކީ އޭރު ރާއްޖޭގެ ވެރި ކަމުގައި ތިބީ ކޮންބައެއްތޯ ބަލައިފައިދޭ އެހީއެއް ނޫން ކަމަށެވެ.
މި އިމާރާތް އަޅާފައިވާ ސަރަޙައްދަކީ، ބިން ހަނިކޮށް އޮތް ސަރަޙައްދަކަށްވާތީ، ޕްރޮޖެކްޓް ކުރިއަށް ގެންދިޔުމަށްޓަކައި ބިން އިތުރުކޮށްފައިވެއެވެ. އިންޑިއާ ސަރުކާރުން މިވަނީ 30 މިލިއަން ޑޮލަރުގެ ހިލޭ އެހީއެއް މި ޕްރޮޖެކްޓަށް ހޭދަކޮށްފައި ކަމަށް ވެސް ރައީސް ވިދާޅުވިއެވެ.
މި ޖަލްސާގައި ރައީސް ވިދާޅުވީ ރާއްޖޭގައި މީހުން ދިރިއުޅޭ ހުރިހާ ރަށެއްގައި ދިވެހި ފުލުހުންގެ ޚިދުމަތް ދިނުމަކީ، މި ސަރުކާރުގެ ވަޢުދެއް ކަމަށެވެ. ކޮންމެ ޤައުމެއްގައިވެސް ފުލުހުންނަކީ، މުޖުތަމަޢުގެ ތެރޭގައި ޢާންމު ރައްޔިތުންނާ ލާމެހިގެން، ރައްޔިތުންނަށް އަމާންކަމާއި، ހަމަޖެހުމާއި، ޞުލްޙަމަސަލަސްކަން ހޯދައިދޭން ތިބޭ ބައެއް ކަމަށް ވެސް ވިދާޅުވިއެވެ.
ރައީސް ވިދާޅުވީ ފުލުހުންގެ ޚިދުމަތެއް އޮތުމުގެ ބޭނުމަކީ، ރައްޔިތުންނާ އެކުގައި އަދި ރައްޔިތުންނާ ގާތުން މަސައްކަތްކޮށްގެން، މުޖުތަމަޢުގައި ހުންނަ މައްސަލަތައް ޙައްލުކުރުން ކަަމަށެވެ. ފުލުހުންނަށް ވަކި ޚާއްޞަ ތަމްރީނުތަކެއް ދޭންޖެހެނީ އެ ސަބަބަށްޓަކައި ކަމަށް ވެސް ވިދާޅުވިއެވެ. "މި ކޮލެޖް ހުޅުވިގެން މިދަނީ، ފުލުހުންގެ ތަމްރީނުތަކަށް، މި ޒަމާނުގައި ބޭނުންވާނެ ހުރިހާ ވަސީލަތްތަކަކާއެކު. މި ކޮލެޖުންދޭ ތަޢުލީމާއި ތަމްރީނުގެ ސަބަބުން ޑިމޮކްރެޓިކް އުޞޫލުތަކަށް ފުލުހުންގެ ލޯ ހުޅުވިގެންދާނެ. އަދި ޒަމާނީ ބެސްޓް ޕްރެކްޓިސްތަކަށް އަހުލުވެރިވެގެންދާނެ. އަދި ކޮންމެ ފުލުހަކީ، ރައްޔިތުންގެ އިޙްސާސްތައް ދަންނަ އަދި މަސައްކަތަށް ޤާބިލް މީހަކަށް ވެގެންދާނެ،" ރައީސް ވިދާޅުވިއެވެ.
