ޔޫކްރެއިން-ރަޝިޔާ ގެ މައްސަލައާ ގުޅިގެން އިންޑިއާއިން ވަނީ 7،725 ކިލޯގެ އިންސާނީ އެހީ ޔޫކްރެއިންއާ ހަވާލުކޮށްފައެވެ.
އިންޑިއާއިން ޔޫކްރެއިންއަށް އަލަށް އައްޔަން ކުރި ސަފީރު ހަރްޝް ކުމާރު ޖެއިން ވަނީ، ޒަރޫރީ ބޭސްތަކާއި، ސިއްހީ އާލާތްތައް ހިމެނޭ ގޮތަށް 7725 ކިލޯގެ އިންސާނީ އެހީ، ޔޫކްރެއިންގެ ސިއްހަތާ ބެހޭ ވަޒީރުގެ ނައިބު، އިންސާނީ އެހީއާއި އީޔޫ އިންޓެގްރޭޝަން ހިންގުމާ ހަވާލުވެ ހުންނެވި އޮލެކްސީ ޔަރެމެންކޯއާ ހަވާލުކުރައްވާފައެވެ. ޔޫކްރެއިންގެ ކިޔޭވްގައި ހުންނަ އިންޑިއާ އެމްބަސީން ވަނީ މިވާހަކަ ޓުއިޓާގައި ބުނެފައެވެ.
އިންސާނީ އެހީގެ ފުރަތަމަ ބައި އިންޑިއާއިން ޔޫކްރެއިންއަށް ފޮނުވީ މާޗް މަހުގެ އެއްވަނަ ދުވަހުއެވެ. އެ ޝިޕްމަންޓުގައި ޓެންޓް، ބްލޭންކެޓް، ސާޖިކަލް ގްލޯވްސް، ޕްރޮޓެކްޓިވް އައި ގިއާ، ވޯޓާ ސްޓޯރޭޖް ޓޭންކް، ސްލީޕިން މެޓް އަދި ސަތަރިއާއި ބޭސް އަދި އެހެނިހެން އެހީގެ ސާމާނު ހިމެނޭ ގޮތަށް ދެ ޓަނުގެ އިންސާނީ އެހީ ހިމެނެއެވެ.
އޭގެ ފަހުން މާޗް މަހުގެ 9 ވަނަ ދުވަހު އިންޑިއާއިން ޔޫކްރެއިންއަށް އިންސާނީ އެހީގެ ދެވަނަ ބެޗެއް ފޮނުވީ އިންޑިއާ ވައިގެ ސިފައިންގެ ފްލައިޓަކުންނެވެ.
ޚާރިޖީ ވަޒީރު އެސް ޖައިޝަންކަރު ވިދާޅުވީ، މިދިޔަ މާޗްމަހު އިންޑިއާއިން ޔޫކްރެއިންއަށް 90 ޓަނުގެ ރިލީފް މެޓީރިއަލް ފޯރުކޮށްދީފައިވާ ކަމަށާއި، އިންޑިއާއިން ބޮޑަށް ފޯކަސް ކުރަނީ ޔޫކްރެއިންއަށް އިތުރު ބޭސް ސަޕްލައި ކުރުމަށް ކަމަށެވެ.
