އިސްރާއީލުގެ ތިން މީހަކު މަރާލައި، އިތުރު ތިން މީހަކު ވަރަށް ބޮޑަށް ޒަޚަމްކޮށްލި މިދިޔަ ބުރާސްފަތި ދުވަހު އޮޕަރޭޝަން ހިންގުމުގައި ބައިވެރިވި ސުބްހީ ސަބީހާތާއި އަސްއަދުއްރިފާއީ އިޒްރޭލު ސިފައިން ހޯދައިގެން ހައްޔަރުކޮށްފިއެވެ. މިއަދު ހައްޔަރު ކުރި އުމުރުން 19 އަހަރުގެ އަސްއަދުއްރިފާއީއާއި، އުމުރުން 20 އަހަރުގެ ސުބްހީ ސަބީހާތުގެ އާއިލާތަކުން ބުނާ ގޮތުން އިޒްރޭލު ސިފައިން ވަނީ، އެ ދެ މީހުންނަށް ވަރަށް އަނިޔާ ކޮށްފައެވެ.
އިސްރާއީލުގެ މީޑިއާއިން ރިޕޯޓްކޮށްފައިވާ ގޮތުގައި، އެ ދެ ޒުވާނުން ހައްޔަރު ކުރީ އިލްއާދުގެ އަވަށާ 500 މީޓަރު ދުރުގައި އޮންނަ ސަރަހައްދަކުންނެވެ.
މި ދެމީހުން ފެނުނީ ގަސްތަކެއްގެ ތެރޭގައި ފިލައި ތިއްބައެވެ. އަދި އެތާގައި ވަގުތުން ހިންގި ތަހުގީގުގައި އެމީހުން ވަނީ އިލްއާދްގެ އޮޕަރޭޝަން ހިންގި ކަމަށް އެއްބަސް ވެފައެވެ.
ސިބްހީ ސަބީހާތުގެ ބައްޕަ ބުނިގޮތުގައި ޒުވާނުން ހައްދުފަހަނައަލައި ދަނީ އިޒްރޭލުގެ އަނިޔާވެރި އަމަލުތަކުންނެވެ.
