ރަޝިޔާގެ އުދުވާނާ ގުޅިގެން އިންޑިއާއަށް ޔުކްރެއިން އިން އިތުރު ވިޔަފާރި ލިބިއްޖެއެވެ. ޔޫކްރެއިންގެ އައިޓީ ކުންފުނިތަކުން އިންޑިއާގައި އެމީހުންގެ ސޮފްޓްވެއަރ ޑިވެލޮޕް ކުރާ މަރުކަޒުތައް ހުޅުވަން ނިންމައިފިއެވެ.
ޔުކްރެއިންގައި ރަޝިޔާއިން ހަނގުރާމަ ފެށުމާ ގުޅިގެން މަސް ދުވަހުގެ ތެރޭގައި ޔޫކްރެއިންގެ އައިޓީ ކުންފުނިތަކުން އިންޑިއާގައި އޮފީސް ހުޅުވުމަށް މަޝްވަރާތައް ފެށިއެވެ. އަދި އިންޑިއާގެ ރެކްރޫޓްމެންޓް ކުންފުނިތަކުން މީހުން ހޯދުމަށްވެސް މަޝްވަރާ ކޮށްފައި ވެއެވެ.
ޔޫކްރެއިންގެ އައިޓީ ކުންފުނިތަކަކީވެސް އިންޓަރނޭޝަނަލް މާކެޓަށް ކޭޓާ ކުރާ ބައެއްކަމުން އެމީހުންވެސް ކަނޑައެޅިފައިވާ މުއްދަތަށް ސާރވިސް ޑެލިވަރީ ނުކޮށްފިނަމަ ކްލައިންޓުންގެ ފަރާތުން ބޮޑެތި އަދަބުތައް ނުވަތަ ޖުރިމާނާތަކާ ކުރިމަތި ލާން ޖެހެއެވެ. ހަނގުރާމައިގެ ކުރިން އެކުންފުނިތަކުން ގެންގުޅުނު މުވައްޒަފުން މިހާރު ޕޮލެންޑާއި ބެލަރޫސްފަދަ ތަންތަނަށް ހިޖުރަކޮށްފައި ވުމުން ކުންފުނިތަކަށް މަސައްކަތް ނިންމުމަށް ދަތިތަކާ ކުރިމަތިލާން ޖެހިފައި ވެއެވެ.
އިންޑިއާގެ ބިޒްނަސް ލައިން ނޫހުން ބުނިގޮތުގައި ބޭންކިން، ޔޫޓިލިޓީސްއާއި ތެލާއި ހަކަތައިގެ ދާއިރާތަކަކީ ކުރިއަށް އޮތް ދުވަސްތަކުގައި އިންޑިއާގެ އައިޓީ ހުނަރުވެރިން ހޯދުމަށް ޔުކްރެއިންގެ ކުންފުނިތަކުން މަސައްކަތް ކުރާނެ ދާއިރާތަކެވެ.
އިންޑިއާގެ އެޗްއާރް ސެކްޓަރއިން ލަފާ ކުރާ ގޮތިގައި ޔުކްރެއިންގެ ހަނގުރާމައިގެ އަސަރު ކުރުމުން އިންޑިއާގެ ޖޮބް މާކެޓަށް ގާތްގަނޑަކަށް 65،000 ވަޒީފާ އިތުރުވެގެންދާނެ ކަމަށް ބެލެވެއެވެ.
އަވަށްޓެރި ޕޮލެންޑް، ބެލަރޫސް، ޗެކް ރިޕަބްލިކް، ކްރޮއޭޝިއާ، ރޫމޭނިއާ އަދި ބަލްގޭރިއާ ފަދަ ގިނަ ގައުމުތަކަކީ ޔޫކްރެއިންއަށް އައިޓީ ސާވިސްގައި ބަރޯސާވާ ވަމުން ދިޔަ ގައުމުތަކެވެ.
ޔުކްރެއިންގައި ފަސްހާހެއްހައި އިންޓަރނޭޝަނަލް ކްލަޔަންޓުންނަށް ޚިދުމަތް ދިނުމަށް ބައި ލައްކައެއްހައި ޕްރޮޝެނަލުން މަސައްކަތް ކުރަމުން ދިޔައެވެ.
