ސްރީލަންކާއަށް ދިމާވެފައިވާފަދަ މާލީ ދަތިކަމެއް ކުރިމަތިވުމުގެ މަރުހަލާގައި އޮތް ޕާކިސްތާނުން އައިއެމްއާއެކު ދޯޙާގައި މަޝްވަރާތައް ފަށަން ތައްޔާރު ވެއްޖެއެވެ.
އައިއެމްއެފްގެ އެކްސްޓެންޑްޑް ފަންޑް ފެސިލިޓީގެ ދަށުން އެއް ބިލިއަން ޑޮލަރު ދޫކުރުމަށް އައިއެމްއެފްއާ އެކު ރިވިއު މަޝްވަރާތައް ފެށުމަށް ހަމަޖެހިފައިވާ ކަމަށް ދަ ނިއުސް އިން އަންގާރަ ދުވަހު ބުނެފި އެވެ. މި ރިވިއު މަޝްވަރާތައް މާދަމާ ދޯހާގައި ކުރިއަށްދާނެއެވެ. އަދި މި މަޝްވަރާތައް ހަފްތާއެއްހާ ދުވަހަށް ކުރިއަށް ގެންދެވޭނެއެވެ.
އައިއެމްއެފްއިން ކުރިން ޕާކިސްތާނަށް ހުށަހަޅާފައި ވަނީ ތެލަށް ސަރުކާރުން ދޭ ސަބްސިޑީ އުވާލާށެވެ. ނަމަވެސް އެކަން އަދިވެސް ސިޔާސީ ސަބަބު ތަކާ ހެދި ކުރެވިފައެއް ނުވެއެވެ.
އިސްލާމްއާބާދުން ފިއުލް ސަބްސިޑީ ނައްތާލާފައި ނުވިއަސް ޕާކިސްތާނަށް ދިނުމަށް ކުރިން މަޝްވަރާ ކުރެވުނު ހުއްޓިފައިވާ ހަ ބިލިއަން ޑޮލަރު އަލުން ދިނުމަށް ޕާކިސްތާނުން އައިއެމްއެފަށް ވިސްނައި ދޭނެއެވެ.
ޕާކިސްތާން ސަރުކާރުގެ ކޯލިޝަން ޕާޓްނަރުން އެއްބަސްވެއްޖެނަމަ، ތެލަށް ސަރުކާރުން ދޭ ސަބްސިޑީ ކަނޑާލަން ހުށަހަޅާފާނެއެވެ. ޕާކިސްތާން މަސްއޫލުވެރިން ވިދާޅުވާ ގޮތުގައި އެބޭފުޅުން ބޭނުންފުޅުވަނީ މަޝްވަރާ ކުރިއަށް ގެންދިއުމަށްޓަކައި ކުރެވޭނެ ކަންކަން ބެއްލެވުމަށެވެ.
ޕާކިސްތާންގެ މާލީ އަދި މަނިޓަރީ ޕޮލިސީތައް އިތުރަށް ހަރުކަށި ކުރުމަށްވެސް ސިޔާސަތު ކަނޑައަޅާ ފަރާތްތަކުން އައިއެމްއެފްއިން އެދެއެވެ. އަދި ޕާކިސްތާންގައި ކުރިއަށް އެކުލަވާލާ ބަޖެޓުގައިވެސް އިތުރަށް ޓެކްސް ނެގުމަށް އިތުރު ފިޔަވަޅުތައް ތައާރަފް ކުރުމަށް ވެސް އައިއެމްއެފްއިން ލަފާދެއެވެ. އައިއެމްއެފް އިން އިސްލާމްއާބާދުގައި އެދިފައި ވަނީ 2022-23 ވަނަ އަހަރުގެ ބަޖެޓްގައި ޓެކްސްގެ ގޮތުގައި 7،255 ބިލިއަން ރުފިޔާ ނެގުމަށް ހިމަނާށެވެ. މިއީ މިހާރު މާލީ އަހަރަށް އަމާޒުކޮށްފައިވާ 6،100 ބިލިއަން ރުފިޔާ އަށް ބޮޑު އަދަދެކެވެ. އަދި ކުރިއަށް އޮތް މަނިޓަރީ ޕޮލިސީގައި އިތުރަށް ހަރުދަނާކުރުމަށް ވެސް އައިއެމްއެފް އިން ލަފާދެ އެވެ.
ޕާކިސްތާނަކީ އެންމެ ކުޑަ ކޮށް ޓެކްސް ނަގާ ސަބްސިޑީއަށް ބަރޯސާވާ މުޖުތަމައެކެވެ.
