ދީނީ ސުއާލެއް ކޮށްފިނަމަ ޖަވާބު ވެސް ދޭނެއެވެ. އުމުރާގެ އަޅުކަން އަދާކުރަންވީ ގޮތާ ބެހޭ ގޮތުން އަހަފިނަމަ އެކަން ކުރަންވާ ގޮތްވެސް ކިޔައި ދޭނެއެވެ. އަދި ފަތަވާއަކަށް އަހައިފިނަމަ ފަތަވާވެސް ދޭނެއެވެ. މިއީ ކަޢުބަތުﷲގެ ގެފުޅުގައި ބަހަތއްޓާފައިވާ ރޮބޮޓްތަކެކެވެ.
މި ރޮބޮޓްތައް 11 ބަހުން މީހުންނާ މުއާމަލާތު ކުރާނެއެވެ. އޭގައި ދިވެހި ބަހެއް ނުހިމެނެއެވެ. ނަމަވެސް ޢަރަބި، އިނގިރޭސި، ފަރަންސޭސި، ރަޝިޔާ، ފާރިސީ، ތުރުކީ، މެލޭ، އުރުދޫ، ޗައިނީޒް، ބެންގާލީ، ހައުސާ ބަހުން މި ރޮބޮޓްތައް ފަސޭހައިން މޮށެހަދާނެއެވެ.
ހަތަރު ފުރޮޅު ލާފައިވާ 21 އިންޗީގެ ޓަޗް އިސްކިރީނެއް ހިމެނޭ މި ރޮބޮޓްތައް ހައްޖާޖީންނަށް މަގު ދައްކައިދީ ހަދާނެއެވެ. އަދި ދަންނަބޭކަލުން އެބޭކަލުންގެ މަރުކަޒުތަކުގައި ތިއްބަވައިގެން ސާއިލީންނާ މުއާމަލާތް ކުރެއްވުމަށް މި ސޮރުމެން ފަހިކޮށްދޭނެއެވެ.
މިސޮރުމެންގައި ހައި ރިޒޮލިއުޝަން ކެމެރާއާއި، ހައި ރިޒޮލިއުޝަން ހެޑްފޯން އަދި ސާފު އަޑު ފޮނުވޭގޮތަށް މައިކްރޯފޯނެއް ވެސް ހަރުކޮށްފައި ހުރެ އެވެ. މި ސޮރުމެން މަސައްކަތް ކުރާނީ ވައިފައި ވިއުގައެއްގައި ހައުލިކޮށް ޑޭޓާ ފޮނުވައިދޭ ގޮތަށެވެ.
މިއީ ގެފުޅުގައި ބޭނުން ކުރާ މިފަދަ ފުރަތަމަ ރޮބޮޓެއް ނޫނެވެ. މި ވައްތަރުގެ ސޮރުންތައް ގެފުޅު ސެނިޓައިޒް ކުރުމުގައިވެސް އުޅެއެވެ. އަދި ގައިދުރު ކަމާއެކު ޒަމްޒަމް ފެން ފުޅި ފޯރިވައިދޭންވެސް މި ސޮރުމެންގެ އެހެން އާއިލާއެއް އުޅެއެވެ.
