ބިލިއަނަރު އީލޮން މަސްކް އަންހެނަކަށް ޖިންސީ ގޮތުން ފުރައްސާރަ ކުރިކަމަށް ބުނާ ވާހަކަ އޭނާ ދޮގުކޮށްފިއެވެ. ޕްރައިވެޓް ޖެޓެއްގައި 2016 ވަނަ އަހަރު ކުރި ދަތުރެއްގައި ފްލައިޓް އެޓެންޑެންޓަކަށް ޖިންސީ ގުނަވަން ދެއްކިކަމަށް ބުނެ ބިޒްނަސް އިންސައިޑާއިން ވަނީ ރިޕޯޓް ކޮށްފައެވެ. މި ތުހުމަތާ ގުޅިގެން ޓްވިޓާގައި މަސްކު ބުނެފައި ވަނީ މިއީ މުޅިން ވެސް ހަގީގަތެއް ނެތް ވާހަކަތަކެއް ކަމަށެވެ.
ބިޒްނަސް އިންސައިޑަރ އިން ރިޕޯޓުކޮށްފައިވާ ގޮތުގައި މަސްކްގެ ސްޕޭސް އެކްސް އިން 2018 ވަނަ އަހަރު މި މައްސަލާގައި ހިމެނޭ ފަރާތަށް 250،000 ޑޮލަރު ދީ، ކޯޓުން ބޭރުގައި މައްސަލަ ނިންމާފައިވާ ކަމަށް، މަސްކުގެ ފުރައްސާރައިގެ ޝިކާރައަކަށް ވެފައިވާ އަންހެން ކުއްޖާގެ ރަހުމަތްތެރިއަކު މައުލޫމާތު ދީފައި ވެއެވެ.
މަސްކު ބުނާ ގޮތުން މިވާހަކައަކީ ތެދެއްކަން ސާބިތުކޮށްދޭން އެމީހަކު އޭނާގެ އޮރިޔާމުން ފެނުނު ހިސާބެއްގައި ޚާއްސަ ނިޝާނެއް ޓެޓޫއެއް އެއްޗެއް ހުރިތޯ ކިޔައިދޭން ވީއެވެ. އަދި މިއީ ހަދައިގެން ދައްކާފައިވާ ވާހަކައެއް ކަމަށް މަސްކު ބުނެފައި ވެއެވެ.
ދުނިޔޭގެ މަހާ ސާދާގަރުންގެ ތެރޭން އަންހެނަކަށް ފުރައްސާރަ ކުރިކަމަށް މީގެ ކުރިން ބިލް ގޭޓްސްއަށްވެސް ތުހުމަތުތަކެއް ކުރެވުނެވެ.
