ސްރީލަންކާގެ ބޮޑުވަޒީރު ވަނީ އެގައުމަށް ކާބޯތަކެތީގެ ދަތިކަން ކުރިމަތިވާނެ ކަމުގެ އިންޒާރު ދެއްވާފަ އެވެ. މިދިޔަ އަހަރުގެ އޭޕްރީލް ރައީސް ގޯޓާބަޔަ ރާޖަޕަކްސަގެ ކެމިކަލް ފާޓިލައިޒާގެ ބާވަތްތައް އެތެރެކުރުން މަނާކުރުމަށް ނިންމެވި ނިންމެވުމާ ގުޅިގެން ސްރީލަންކާގެ ދަނޑުވެރިކަމުގެ މަތިވަރު ވަނީ ދަށްވެފައެވެ. ފަހުން ސަރުކާރުން ވަނީ އެ ނިންމުން ބަދަލުކުރި ނަމަވެސް މިހާތަނަށް އިތުރަށް ކެމިކަލް ފާޓިލައިޒާ އިމްޕޯޓެއް ކޮށްފައެއް ނުވެއެވެ.
ޓްވިޓާ މެދުވެރިކޮށް ދެއްވި މެސެޖެއްގައި ބޮޑުވަޒީރު ރަނިލް ވިކްރަމަސިންހަ ވިދާޅުވީ، މިހާރު މިހިނގާ ދަނޑުވެރިކަމުގެ މޫސުމަށް ބޭނުންވާ ފާޓިލައިޒާ ހޯދުމަށް އެކަށީގެންވާ ވަގުތު ނުލިބިދާނެކަމަށެވެ. ނަމަވެސް ސެޕްޓެމްބަރު-މާޗްގެ ދަނޑުވެރިކަމުގެ މޫސުމަށް އެކަށީގެންވާ ފާޓިލައިޒާގެ ސްޓޮކް ކަށަވަރު ކުރުމަށް ފިޔަވަޅުތަކެއް ސަރުކާރުން އަޅަމުންދާ ކަމަށެވެ. އޭނާ ވަނީ ހާލަތގެ ނާޒުކުކަން ހުރިހައި ފަރާތަކުންވެސް ގަބޫލުކުރުމަށް އެދިވަޑައިގެންފައެވެ.
ލަންކާގެ ރައީސް ރާޖަޕަކްސަ ވަނީ އާ ނުވަ ބޭފުޅަކު ހިމެނޭ ކެބިނެޓެއް އައްޔަން މިއަދު އައްޔަން ކުރައްވާފައެވެ. އޭގެ ތެރޭގައި ސިއްހަތާއި ވިޔަފާރި ފަދަ މުހިންމު ދާއިރާތަކަށ ވަޒީރުން އައްޔަން ކުރައްވާފައި ވެއެވެ. ނަމަވެސް މާލީ ވަޒީރެއް އައްޔަން ކުރައްވާފައެއް ނުވެއެވެ. ބެލެވޭ ގޮތުގައި އެމަގާމު ބަލަހައްޓަވާނީ ވިކްރަމަސިންހަ އަމިއްލަފުޅަށެވެ.
ފަތުރުވެރިކަމަށް ބަރޯސާވެފައިވާ ސްރީލަންކާއަށް ބޭރު ފައިސާގެ ދަތިކަމާއި، ތެލާއި ބޭސް ލިބުމުގެ ދަތިކަން އިންތިހާއަށް ކުރިމަތިވެފައިވާއިރު، އިގުތިސޯދީ ހަރަކާތްތައް ވެސް ވަނީ އެއްކޮށް މަޑުޖެހިފައެވެ.
މީހުންގެ މެދުގައި ކުރިމަގާ މެދު ވަނީ މާޔޫސީއާއި ނުތަނަވަސްކަން އިންތިހާއަށް ފެތުރިފައެވެ. ކައްކާ ގޭސް ސިލިންޑަރު ހޯދުމަށް އަދިވެސް ދިގު ކިޔޫތައް ހަދަމުން ދެއެވެ. އޭޕްރީލް މަހު ގޭސް ސިލިންޑަރުގެ އަގު ވަނީ 2،675 ރުޕީސް އިން ގާތްގަނޑަކަށް 5،000 ރުޕީސްއަށް ބޮޑުވެފައެވެ. ކިޔޫގައި 500 މީހުން ތިބޭ އިރު ދުވާލަކަށް ދެވެނީ 200 ސިލިންޑަރެވެ.
އާންމު ރައްޔިތުން ވަނީ މިދާ ރޭޓްގައި ގޮސް އެމީހުން ބަނޑަށް ޖެހޭނެކަމަށް ބުނެފައެވެ.
ލަންކާގެ މަރުކަޒީ ބޭންކުގެ ގަވަރުނަރު ވިދާޅުވާ ގޮތުގައި ތެލާއި ކައްކާ ގޭހުގެ ޝިޕްމަންޓަށް ފައިސާ ދެއްކުމަށް ބޭނުންވާ ބައެއް ފައިސާ ހަމަ ކުރެވިފައި ވެއެވެ. ނަމަވެސް އަދިވެސް އިތުރަށް ފައިސާ ބޭނުން ވެއެވެ.
ކުރިއަށް އޮތް ދެމަހެއްހާ ދުވަހުގެ ތެރޭގައި އިންފްލޭޝަން 40 ޕަސެންޓަށް މައްޗަށް ދާނެ ކަމަށް ގަވަރުނަރު ލަފާ ކުރައްވައެވެ.
ސްރީލަންކާގައި ކާބޯތަކެތީގެ އަގުތައް ވަނީ 46ޕަސެންޓަށް މައްޗަށް ގޮސްފައެވެ.
