މަންކީޕޮކްސް ޖެހިފައިވާ މީހުން، އެމެރިކާއާއި ކެނެޑާ، ސްޕެއިން، ޕޯޗުގަލް އަދި އިނގިރޭސިވިލާތުގައި ފެނިފައިވާތީ މި ބަލި ފެތުރެން މެދުވެރިވެފައިވާ ސަބަބާ މެދު ހޯދުންތައް ހޯދަން ފަށައިފިއެވެ. އާންމު ސިއްޙަތާ ބެހޭ ފަރާތްތަކުން އިންޒާރު ކުރާ ގޮތުގައި ވަބާއެއްގެ ގޮތުގައި މަންކީ ޕޮކްސް ދުނިޔެއަށް ފެތުރިގެން ހިނގައިދާނެ ކަމުގެ ބިރު އެބަ އޮތެވެ.
ކެނެޑާއަށް ދަތުރުކޮށްފައި އައި އެމެރިކާ މީހަކަށްވެސް މި ބަލި ޖެހިފައިވާ ކަމަށް ރިޕޯޓް ކޮށްފައެވެ.
ދުނިޔޭގެ ސިއްޙަތު ޖަމުއިއްޔާއިން ދަނީ މި ބަލި ފެނިފައިވާ ގައުމުތަކާއެކު ކޯޑިނޭޓް ކުރަމުންނެވެ.
މަންކީޕޮކްސް އަކީ މެދުތެރޭ އަދި ހުޅަނގު އެފްރިކާގެ އެކަހެރި ހިސާބުތަކުގައި އާންމު ބައްޔެކެވެ. އެފްރިކާއިން ބޭރުގައި މި ބަލީގެ ކޭސްތައް ގިނަ ފަހަރަށް ގުޅިފައިވަނީ އެސަރަހައްދުތަކަށް ދަތުރުފަތުރުކުރުމާއެވެ.
އިނގިރޭސިވިލާތުގެ ހެލްތު އިންޝުއަރެންސް އޮތޯރިޓީން ބުނާ ގޮތުގައި މަންކީޕޮކްސް އަކީ ވަރަށް މަދުން ނޫނީ ނުފެންނަ އަދި އާންމު ގޮތެއްގައި އާދައިގެ ވައިރަލް އިންފެކްޝަނެކެވެ.
މި ބަލި ޖެހޭ މީހުން 21 ދުވަސްވަންދެން މި ބަލީގައި އުޅެއެވެ.
އިނގިރޭސިވިލާތުން ބުނަނީ މި ވައިރަސްއަކީ މީހުންގެ މެދުގައި އެހާ ފަސޭހައިން ފެތުރޭ ވައިރަހެއް ނޫން ކަމަށާއި އާންމު ރައްޔިތުންނަށް އޮތް ނުރައްކާ ވަރަށް ކުޑަ ކަމަށެވެ.
އިނގިރޭސިވިލާތުގައި މި ބަލީގެ ފުރަތަމަ ކޭސް ރިޕޯޓްކޮށްފައިވަނީ މެއި މަހުގެ 7 ވަނަ ދުވަހުއެވެ. މި ބަލި ޖެހުނު މީހާއަކީ ދާދިފަހުން ނައިޖީރިއާއަށް ދަތުރުކުރި މީހެއް ކަމަށް ވެއެވެ.
އިނގިރޭސިވިލާތުގައި މިހާރު ޕޮޒިޓިވް ވެފައިވާ ނުވަ މީހަކު އެބަތިއްބެވެ. ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިން ބުނާ ގޮތުގައި މި ބަލި ފެތުރެން މެދުވެރިވެފައިވާ ސަބަބު އަދި ކަށަވަރު ކުރެވިފައި ނުވެއެވެ.
