ޖޭ.ޕީ މޯގަންގެ ތަހުލީލަކުން ދައްކާގޮތުގައި، އިގްތިސާދީ ގޮތުން މިވަގުތު އެންމެ ހާލުގައި އޮތް ތިން ގައުމަކީވެސް ޗައިނާގެ ތިން ރަހުމަތްތެރިންނެވެ. އެއީ މިސްރާއި ސްރީލަންކާގެ އިތުރުން، ޕާކިސްތާނެވެ. މިތިން ގައުމަށްވެސް ވަނީ ތެލުގެ އަގުތައް އުފުލެމުން ދިއުމާއި ކާބީތަކެތީގެ އަގުތައް ބޮޑު ވެގެން ދިއުމުން ދިރިއުޅުން ދަތިވެފައެވެ.
މިސްރުގައިވެސް މުދަލުގެ އަގުތައް ވަނީ އިންތިހާއަށް މަތިވެފައެވެ. އަދި ބޭރުފައިސާގެ ރިޒާވް ހުސް ވުމާއި ކައިރި ވެފައެވެ. ސަރުކާރުން އިދިކޮޅު ފަރާތްތަކާ ވާހަކަ ދެއްކުމަށް ބާއްވަން އުޅޭ ބައްދަލުވުންތައްވެސް އަދި ބެއްވޭ ގޮތެއް ނުވެއެވެ.
މިސްރުގެ އެންމެ ބޮޑު ނުތަނަވަސް ކަމަކަށް ވެފައި ވަނީ ރައްޔިތުންނަށް ބޭނުންވާ ގޮދަން އެތެރެ ކުރުމުގެ މައްސަލައެވެ. އިންޑިއާއާއި ޕާކސިްތާނުން ގޮދަން އެތެރެ ކުރުމަށް މިސްރުން މަޝްވަރާ ކުރަމުން ދެއެވެ.
ޕާކިސްތާނު ސަރުކާރުން ވަނީ ހަ ބިލިއަން ޑޮލަރުގެ ބޭރު ފައިސާ ސަލާމަތް ކުރުމަށް އަސާސީ ސާމާނުކަމަށް ނުބެލެވޭ ބައެއް ބާވަތްތައް އިމްޕޯޓުކުރުން މަނާ ކޮށްފައެވެ.
ޕާކިސްތާނުން ތެލަށްދޭ ސަބްސިޑީ ކަނޑާލަން އަދިވެސް ސަރުކާރުން ދަނީ ޖެހިލުން ވަމުންނެވެ. މިއީ އައިއެމްއެފްއިން ޕާކސްތާން ސަރުކާރަށ ކުރުމަށް މަޖުބޫރު ކުރާ ކަމެކެވެ.
ސަރުކާރުން ބުނަނީ ތެލުގެ ސަބްސިޑީ ހިފަހައްޓާފައި ވަނީ ރައްޔިތުންނަށް އިތުރު ދަތިކަމެއް ކުރިމަތިވިޔަ ނުދޭން ވެގެންނެވެ.
މި މަހުގެ 12 ވަނަ ދުވަހު އާންމުކުރި ސަރުކާރުގެ ޑޭޓާ ދައްކާ ގޮތުގައި އެއް ހަފުތާ ތެރޭ ފިޔާގެ އަގު ވަނީ 42 ޕަސެންޓް މައްޗަށް ގޮސްފަ އެވެ. ޚިޔާލު ހޯދުންތައް ދައްކާ ގޮތުން ބާޒާރުގައި ތަކެތީގެ އަގަކީ ވޯޓުލާ މީހުން އެންމެ ބޮޑަށް ސަމާލުކަން ދޭ ހައްސާސް މައްސަލަ އެވެ.
ގެލަޕް ޕާކިސްތާނުން މިދިޔަ އޭޕްރީލް މަހު ނެގި ޚިޔާލު ހޯދުމުން ދައްކާ ގޮތުގައި، ކުރީގެ ބޮޑުވަޒީރު އިމްރާން ޚާންގެ ވެރިކަން ބަދަލުވުމަށް ރުހުން ދިން މީހުންގެ ތެރެއިން 71 އިންސައްތަ މީހުން ވަނީ އިމްރާން ޚާންގެ ސަރުކާރަކީ ތަކެތީގެ އަގު މައްޗަށް ދިއުމަށް ސަބަބެއްކަމަށް ބުނެފައެވެ.
