އަފްޣާނިސްތާނުގެ ކުރީގެ ހަނގުރާމަވެރިންނާއި، ގައުމުން ބޭރުކޮށްލާފައިވާ ސިޔާސީ ފަރާތްތަކުން ތާލިބާނުންނާ ދެކޮޅަށް ހަނގުރާމަ ކުރުމަށް ހައި ކައުންސިލް އޮފް ނޭޝަނަލް ރެސިސްޓެންސްގެ ނަމުގައި ކައުންސިލެއް އުފެއްދައިފިއެވެ. މިކައުންސިލް އެކުލަވާލާފައި ވަނީ އަފްޣާނިސްތާންގައި ހުރިހައި ފަރާތެއް ޝާމިލުވާ ސަރުކާރެއް ތާލިބާނުން އެކުލަވާ ނުލަނީނަމަ، ގައުމު އަލުން އަހުލީ ހަނގުރާމައަކަށް ވެއްޓިގެން ހިނގައިދާނެކަމަށް ބުނެއެވެ.
މިދިޔަ އަހަރު އެމެރިކާ ސިފައިން އަވަސް އަރުވާލައިގެން އަފްޣާނިސްތާނުން ފައިބައިގެން ދިއުމާ ގުޅިގެން ތާލިބާނުން އަލުން ވެރިކަމަށް އައި ފަހުން، އަފްޣާނިސްތާނުގެ ފަރާތްތަކުން ތާލިބާނާ ދެކޮޅަށް މާބޮޑު މަސައްކަތެއް ކޮށްފައެއް ނުވެއެވެ.
އަފްޣާނިސްތާނުގެ ކުރީގެ ނައިބު ރައީސް އަދި ހަނގުރާމަވެރި ލީޑަރު އަބްދުލް ރަޝިދު ދޯސްތުމްގެ ދައުވަތަކަށް އަންކާރާގައި މިދިޔަ އަންގާރަ ދުވަހު އަފްޣާނިސްތާންގެ 40 ސިޔާސީ ޝަހްސިއްޔަތެއް ބައްދަލުކޮށްފައި ވެއެވެ. މި ފަރާތްތަކުން ވަނީ އޮގަސްޓް މަހު ކާބުލް ތާލިބާންގެ އަތްދަށަށް ދިއުމާ ގުޅިގެން ތުރުކީން ހިމާޔަތް ހޯއްދަވައިފައެވެ.
ތާލިބާނާ ދެކޮޅަށް އެކުލަވާލި ހައި ކައުންސިލުން ބުނަނީ އަފްޣާނިސްތާނު ތާލިބާންގެ އަތްދަށުން މިނިވަންކުރުމުގެ މަގު ފަހިކޮށްދޭން ޖެހޭ ކަމަށެވެ.
މިކައުންސިލްގެ މުއައްސިސުންގެ ތެރޭގައި ކުރީގެ ބަލަޚް ޕްރޮވިންސްގެ ގަވަރުނަރު އައްތާނޫރު މުޙައްމަދާއި ހަޒާރާއިންގެ ލީޑަރު މުހައްމަދު މުހައްގިގުއާއި ނެޝަނަލް ރެސިސްޓެންސް ފޯސްގެ އަހުމަދު ވާލީ މަސްއޫދާއި ތާލިބާންގެ ދެކޮޅުވެރި އަބްދު ރައްބުއްރަސޫލް ސައްޔާފް ހިމެނިވަޑައިގަންނަވައެވެ.
