އަފްޣާނިސްތާނުގެ ބަލްޚް ޕްރޮވިންސްގެ މަޒާރޭ ޝަރީފްގައި ތާލިބާންގެ ފުލުހުންގެ ގާފިލާއަކަށް ދިން ހަމަލާގެ ޒިންމާ ތަހްރީކޭ އާޒާދީ އަފްޣާނިސްތާން (އަފްޣާނިސްތާން ފްރީޑަމް މޫވްމަންޓް) އިން ނަގައިފިއެވެ.
މަޒާރޭ ޝަރީފްގެ 5 ވަނަ ޑިސްޓްރިކްޓްގައި މިއަދު ހެނދުނު ގޮއްވާލި ބޮމުގައި ތިން މީހަކު ޒަޚަމްވެފައިވެއެވެ.
ބަލްޚް ޕްރޮވިންސްގައި ހުންނަ ތާލިބާން ފުލުހުންގެ އޮފީހުގެ ތަރުޖަމާނު މުހަންމަދު އާސިފް ވާޒިރީ، ބުނި ގޮތުގައި، ތާލިބާނު ފުލުހުން އާންމުން ގޮވައިގެން ދަތުރުކުރި ވެހިކަލަކަށް ހަމަލާދީ، ތިން މީހަކު ޒަޚަމްކޮށްލާފައި ވާކަމަށެވެ. ނަމަވެސް، ތަހްރީކޭ އާޒާދީ އަފްޣާނިސްތާނުގެ ތަރުޖަމާނެއް ކަމަށްވާ ޚާލިދު ޕަސޫން ވިދާޅުވީ، މި ހާދިސާގައި މަދުވެގެން ދިހަ މީހުން މަރުވެ، 12 މީހުން ޒަޚަމްވެފައިވާ ކަމަށެވެ.
އޭނާ ބުނިގޮތުގައި މިއީ މައިން އެއް ގޮއްވައިގެން ދީފައިވާ ހަމަލާއެކެވެ. އޭނާ އިތުރަށް ބުނެފައި ވަނީ، މި ގޮއްވާލުމުގެ ސަބަބުން ތާލިބާންގެ ހަނގުރާމަވެރިން އުފުލާ ޓްރަކެއް މުޅިން ހަލާކުވެފައިވާ ކަމަށެވެ.
މީސްމީޑިއާގައި ފެނުނު ފޮރޯތަކުގައިވެސް އުޅަނދު އެއްކޮށް ހަލާކުވެފައިވާ ތަން ފެނިފައި ވެއެވެ.
އަފްޣާނިސްތާންގެ ރެސިސްޓެންޓް ފްރަންޓާއި ތަހްރީކޭ އާޒާދީ އަފްޣާނިސްތާނުގެ އިތުރުން ވެސް އެހެން އެތައް ޖަމާއަތަކުން ތާލިބާނުންނާ ދެކޮޅަށް ހަމަލާތައް ދެމުން ދެއެވެ.
