ހުޅަނގުގެ ގައުމުތަކުން ޔުކްރެއިންގައި ރަޝިޔާއާ ދެކޮޅަށް ފަށާފައިވަ ކުލީ ހަނގުރާމަ އިތުރަށް ފުޅާ ކުރުމަށް މަސައްކަތް ކުރަމުން ގެންދެއެވެ. އެމެރިކާއާއި ހުޅަނގުގެ ގައުމުތަކުން އަޅާފައިވާ ފިޔަވަޅުތަކަށް ރައްދެއްގެ ގޮތުން ރަޝިޔާއިން މިއަދު ވަނީ އެމެރިކާގެ ރައީސް ޖޯ ބައިޑަންއާއި ކެނެޑާގެ ބޮޑުވަޒީރު ޖަސްޓިން ޓްރޫޑޯއާއި ހުޅަނގާއި އެމެރިކާއާއި ކެނެޑާގެ 989 އޮފިޝަލުން ރަޝިޔާއަށް ވަނުން މަނާކޮށް ކަޅު ލިސްޓްގައި އެފަރާތްތަކުގެ ނަންތައް ހިމަނާފައިވާނެ ކަމަށެވެ.
އެމެރިކާއިން ރަޝިޔާއާއި ދެކޮޅަށް ބޮޑެތި އަދަދުތަކުން އެހީ ދިނުމަށް އިއުލާން ކުރާ އިރު ދުނިޔޭގެ ހާލުގައި ޖެހިފައިވާ އެހެން ގައުމުތަކަށް މި އަދަދުގެ ބައިކުޅަ ބައިވެސް ދިއްކުރާކަށް ބޭނުމެއް ނުވެއެވެ.
އެމެރިކާގެ ރައީސް ޔޫކްރެއިންއަށް 40 ބިލިއަން ޑޮލަރުގެ އެހީއެއް ގައި ސޮއިކުރެއްވިއިރު އިނގިރޭސިވިލާތުން ބޭނުންވަނީ ރަޝިޔާގެ ޙަމަލާއަކުން ޔޫކްރެއިންގެ އަވަށްޓެރި މޯލްޑޯވާއަށް ސަލާމަތް ވުމަށް ހަތިޔާރު ދޭނެކަމަށް ބުނެފައެވެ. މިހިނދު އިނގިރޭސިވިލާތުގައި އާންމު ރައްޔިތުން ދަނީ ކާނާގެ އަގުތައް ބޮޑު ވުމާ ގުޅިގެން އިގުތިސާދީ ދަތިކަމެއް ތަހައްމަލު ކުރާ ކަމަށް ބުނެ ޝަކުވާ ކޮށްފައެވެ.
އިނގިރޭސިވިލާތުގެ ޚާރިޖީ ވަޒީރު ވިދާޅުވީ ރަޝިޔާއިން ދޭ ކޮންމެ އަސްކަރީ ޙަމަލާއެއް ރައްދުކުރުމަށް މޯލްޑޯވާއަށް ޒަމާނީ ހަތިޔާރު އިނގިރޭސިވިލާތުން ފޯރުކޮށްދޭނެކަމަށެވެ.
ރަޝިޔާއިން ބްލެކް ލިސްޓް ކުރި މީހުގެ ތެރޭގައި ސިއައިއޭގެ ޑިރެކްޓަރާއި ކެނެޑާގެ ބޮޑުވަޒީރުގެ އަނބިކަނބަލުންނާއި، ކެނޭޑިއަން އެއާފޯސްގެ ކޮމާންޑަރާއި، އެނޫންވެސް ހުޅަނގުގެ އިސް އޮފިޝަލުން ހިމެނެއެވެ.
ރަޝިޔާގެ ގެޒްޕްރޮމްއިން ވަނީ މިއަދުން ފެށިގެން އަވަށްޓެރި ފިންލެންޑަށް ޤުދުރަތީ ގޭސް އެކްސްޕޯޓްކުރުން މެދުކަނޑާލައިފިއެވެ. ގެޒްޕްރޮމް އިން ބުނެފައި ވަނީ ޔޫރަޕްގެ ގައުމުތަކުން ރަޝިއާގެ ގޭހަށް ފައިސާ ދައްކަން ޖެހެނީ ރަޝިޔާގެ އަމިއްލަ ފައިސާ ރުބެލްއިން ކަމަށެވެ. ފިންލެންޑުން ވަނީ އެ ހުށަހެޅުމަށް ދެކޮޅު ހަދާފަ އެވެ.
