ދުނިޔޭގެ ދެވަނައަށް އެންމެ ގިނައިން ގޮދަން އުފައްދާ ގައުމު އިންޑިއާއިން އަމިއްލަ ފުޑު ސެކިއުރިޓީއަށް ޓަކައި ގޮދަން އެކްސްޕޯޓު ކުރުން މަނާ ކުރީ މި މަހުގެ 13 ވަނަ ދުވަހުއެވެ. ނަމަވެސް ފަހުން އިންޑިއާއިން ވަނީ ވަކި ވަކި ގައުމުތަކުގެ އެދުމަށް ރިއާޔަތް ކޮށް އެކްސްޕޯޓަށް ހުއްދަ ދީފައެވެ.
އިންޑިއާއިން އެންމެ ގިނައިން ގޮދަން އެކްސްޕޯޓް ކުރީ މިސްރަށެވެ.
އިންޑިއާއިން ބުނާ ގޮތުގައި އަންނަ އަހަރށް ލަފާ ކުރާ މަތިވަރު މިއަހަރަށް ވުރެން މަދުވާނެއެވެ. އިންޑިއާގެ އަންދާސާއަކީ އަންނަ އަހަރގެ މަތިވަރު 4 ޕަސެންޓަށް ދަށްވާނެ ކަމަށެވެ.
އިންޑިއާއިން މިހާރު ގޮދަން އެކްސްޕޯޓަށް ހުއްދަ ދީފައި ވަނީ ބަންގްލަދޭޝްއަށާއި އިންޑިއާގެ އަވަށްޓެރި ގައުމުތަކަށެވެ.
އިންޑިއާއިން މިއަހަރަށް އަންދާސާ ކޮށްފައި ވަނީ 111 މިލިއަން ޓަންގެ ގޮދަން އުފައްދާނެ ކަމަށެވެ. ނަމަވެސް އަންނަ އަހަރަށް އަންދާސާ ކޮށްފައިވަނީ 106 މިލިއަން ޓަނެވެ.
ދުނިޔޭގެ ފުޑް ސެކިއުރިޓީ އަކީ މިހާރު ބޮޑުވެފައިވާ މައްސަލައެކެވެ. އދގެ ސަލާމަތީ މަޖިލީހުގައި ފުޑް ސެކިއުރިޓީއާ ބެހޭ ގޮތުން ބުރާސްފަތި ދުވަހު މަޝްވަރާ ކޮށްފައި ވެއެވެ. އދން ބުނާ ގޮތުގައި 38 ގައުމެއްގައި 44 މިލިއަން މީހުންނަށް ވަނީ ބަނޑުހައި ހޫނުކަމާ ކުރިމަތިލާން ޖެހިފައެވެ. އަދި ހަމަނުޖެހުން އުފެދިފައިވާ ސަރަހައްދުތަކުގައި 66 ޕަސެންޓް މީހުން ބަނޑަށް ޖެހިފައިވާ ކަމަށްވެސް އދން ބުނެއެވެ.
