ސްރީލަންކާގެ ކުރީގެ ކެބިނެޓް މިނިސްޓަރ ނަމަލް ރާޖަޕަކްސަ ވަނީ އިންޑިއާއިން އެތައް ބުރަކަށް ސްރީލަންކާއަށް އިންސާނީ އެހީގެ ޝިޕްމެންޓްތައް ފޮނުވާފައި ވާތީ އެކަމަށްޓަކައި އިންޑިއާއަށް ޝުކުރު އަދާކުރައްވާފައެވެ.ކުރީގެ ބޮޑުވަޒީރު މަހިންދަ ރާޖަޕަކްސަގެ ދަރިކަލުން ނަމަލް ރާޖަޕަކްސަ ވިދާޅުވީ، އިންޑިއާއަކީ ފާއިތުވި އަހަރުތަކުގައި ސްރީލަންކާއަށް "ދޮށީ ބޭބެއެއް" ކަމަށާއި، އިންޑިއާއިން މިހާރުގެ ދަތި ހާލުގައި ވެދީފައިވާ އެއީ ލަންކާއިން ދުވަހަކުވެސް ހަނދާން ނައްތާ ނުލާނެ ކަމަށެވެ.ލަންކާއަށް އިންޑިއާއަކީ ޔަގީނުންވެސް ރަނގަޅު ރަހުމަތްތެރިއެއް ކަމުގައި އޭނާ ވިދާޅުވިއެވެ. އިންޑިއާއިން ވަނީ އާދީއްތަ ދުވަހު އެތައް ބިލިއަނަށް ވުރެ ގިނަ ރުފިޔާގެ ޒަރޫރީ އިންސާނީ އެހީގެ ޝިޕްމަންޓެއް ހަވާލުކޮށްފަ އެވެ. މި ޝިޕްމަންޓުގައި 9000 މެޓްރިކް ޓަނުގެ ހަކުރާއި 50 މެޓްރިކް ޓަނުގެ މިލްކް ޕައުޑަރު ހިމެނެއެވެ. އަދި 25 މެޓްރިކް ޓަނަށްވުރެ ގިނަ ބޭހާއި އެހެނިހެން ފާމަސޫޓިކަލް ސާމާނު ވެސް ހިމެނުނެވެ.
ކޮލަމްބޯ ޕޭޖުން ރިޕޯޓްކުރާ ގޮތުގައި މި ޝިޕްމަންޓް ލަންކާގެ އެކި ކަންކޮޅުތަކުގައި ތިބި ގިނަ އެހީއަށް ބޭނުންވެފައިވާ ރައްޔިތުންނަށް ބަހާނީ ސްރީލަންކާ ސަރުކާރުންނެވެ. މަންފާ ލިބޭ މީހުންގެ ތެރޭގައި މުޖުތަމަޢުގެ އެކި ގިންތިތައް އެކި ސަރަހައްދުތަކުން ހިމެނެއެވެ.
ސްރީލަންކާގެ ބޮޑުވަޒީރު ރަނިލް ވިކްރަމަސިންހަ ވަނީ، ލަންކާއަށް ކުރިމަތިވެފައިވާ އިގުތިސޯދީ ހީނަރުކަމުގެ ތެރޭގައި، "އިންޑިއާގެ ރައްޔިތުން" ވެދޭ އެހީތެރިކަމަށް ޝުކުރު އަދާކުރައްވާފައެވެ.އާދީއްތަ ދުވަހު ލިބުނު އެހީއަކީ ޓެމިލްނާޑޫގެ ޗީފް މިނިސްޓަރު އޮނަރަބަލް އެމް ކޭ ސްޓާލިންގ އިންޑިއާގެ ރައްޔިތުންގެ ނަމުގައި ފޮނުވާފައިވާ އެހީ އެވެ. މީގެ ކުރިން އިންޑިއާ ސަރުކާރުން ވަނީ ހިލޭ އެހީގެ ގޮތުގައި ލަންކާއަށް ހިކި ކެއުންތަކާއި ބޭސްއަދި އެނޫންވެސް ޒަރޫރީ ބާވަތްތައް ފޮނުވާފައެވެ.މި ނާޒުކު ދަނޑިވަޅުގައި އިންޑިއާއިން ވަނީ ފައިސާގެ ދަތިކަން ކުރިމަތިވެފައިވާ ކޮލަމްބޯއަށް ކަރަންސީ ސްވޮޕާއި ޒަރޫރީ މުދަލުގެ ކްރެޑިޓް ލައިނަކާއި އަދި 2022 ވަނަ އަހަރުގެ ޖެނުއަރީ މަހުން ފެށިގެން ލޯނު އަނބުރާ ދެއްކުމަށް 3 ބިލިއަން ޑޮލަރާ ގާތްކުރާ އަދަދަކަށް ފައިސާ ދީފައެވެ.
