ޔަހޫދީން ފަލަސްތީނު މީހުންގެ މައްޗަށް ގަދަވެ، އެމީހުންގެ ބިންތަކުން ބޭރުކޮށްލި ފަލަސްތީނުގެ ނަކްބާއަށް މިއަހަރު 74 އަހަރު ފުރޭއިރު، ފަލަސްޠީނުގެ ރައްޔިތުން ޝައުޤުވެރިކަމާއެކު އިންތިޒާރު ކުރަމުން ދަނީ ފަލަސްޠީނުގެ ބިމުން ޒަޔަނިސްޓް ދައުލަތް ނިމުމަކަށް އަންނާނެ ދުވަހަކަށެވެ. ވަޙީގެ ބަސްފުޅުގައި އިސްރާ ސޫރަތުގެ 4 ވަނަ އާޔަތާއި 5 ވަނަ އާޔަތާ ޙަވާލާ ދެއްވަމުން، މީގެ 30 އަހަރު ކުރިން ޝެއިޚް ބައްސާމް ޖައްރާރު ލިޔުއްވި ފޮތުގައި އޮތް ވާހަކަތައް ހަގީގަތަކަށް ވުމަކީ މީހުންގެ އުންމީދެވެ. ބައްސާމުގެ ލިޔުއްވުންތަކުގައި އިޒްރޭލު ނެތިދާނެ އަހަރަކީ 2022ކަމަށް ހިސާބު ޖައްސަވާފައި ވެއެވެ.
ޝެއިޚު ބައްސާމް ވަނީ ޔޫޓިއުބާއު އޭނާގެ އެހެން ލިޔުއްވުންތަކުގައި މިވާހަކަ އެކި ދުވަސްމަތިން ތަކުރާރު ކުރައްވާފައެވެ.
ބައްސާމު ފިޔަވައި މި މައުޟޫއަށް ލިޔުއްވި ޝެއިޚު އަޙުމަދު ޔާސީން ލިޔުއްވާ ގޮތުގައި އިޒްރޭލު ނެތިދާނެ އަހަރަކީ 2027 އެވެ.
އިޒްރޭލު ދައުލަތެއްގެ ގޮތުގައި 80 އަހަރު ފާހަގަ ކުރާނީ 2028ގައެވެ.
ފަލަސްޠީނުގެ ރައްޔިތުންގެ ތެރެއިން ހޭލުންތެރި ޢާންމު ރައްޔިތުންގެ ތެރެއިން ބޮޑު ބައެއް ޤަބޫލުކުރާ ގޮތުގައި އިޒްރޭލުގެ ދައުލަތް ނިމި ދިއުމަކީ ޔަގީނުންވެސް ދިމާވާނެ ކަމެކެވެ. ފަލަސްޠީނާއި ޢަރަބި ސަރަޙައްދާއި ދުނިޔޭގެ އެކި ހިސާބުތަކުގައި ހިނގަމުންދާ ކަންތައްތަކުން ބަދަލުވަމުންދާ އުދަރެހުން ފެންނަމުން ދަނީ އިޒްރޭލުގެ ޒަޔަނިސްޓް ޝަޚްޞިއްޔަތުގެ ޙާލަތަށް މިކަންކަމުން ވަރަށް ބޮޑެތި އަސަރުތަކެއް ކުރަމުންދާ ތަނެވެ.
ބައްސާމާއި ޝެއިޚު ޔާސީނާއި މި މައުޟޫއުގައި ލިޔުއްވި އެހެން ބޭފުޅުންގެ ވާހަކަތަކަށް ފަލަސްތީނާއި މިކަމަށް ތާއިދު ކުރާ އަރަބިންގެ ހިތްތަކުގައި އުންމީދެއް އާލާވެގެން ދިޔައީ މީގެ ދެ ހަފްތާ ކުރިން ކުރީގެ ޒަޔަނިސްޓް ބޮޑުވަޒީރު އެހޫދު ބަރާކްގެ ލިޔުއްވި ދެ މަޒްމޫނަކުންނެވެ.
ބަރާކު ލިޔުއްވަނީ ޔަހޫދީންގެ ތާރީޚުގައި މިއަދާ ހަމައަށް އެއްވެސް ދައުލަތެއްގައި ޔަހޫދީން 80 އަހަރަށް ވުރެން ގިނަ ދުވަސްވަނދެން ވެރިކަން ކޮށްފައި ނުވާކަމަށެވެ.
މި ފަދަ ވާހަކައަކީ، 2028 ވަނަ އަހަރަށް ފަހު އިޒްރޭލުގެ ދައުލަތެއް ވުޖޫދުގައި ނޯންނާނެ ކަމަށް ޝެއިޚް އަޙްމަދު ޔާސީންވެސް ލިޔުއްވި ވާހަކައެކެވެ. މި ތިން ބޭފުޅުންގެ ލިޔުންތައް ތަފާތު ދެ ގޮތަކަށް ދިމާވާތީ މީހުންގެ މެދުގައި މިވާހަކަތައް މިހާރު ވަނީ އާންމު ބަހުސަކަށް ވެފައެވެ. ފަލަސްތީނާއި އިޒްރޭލްގައިވެސްމެއެވެ.
ފަލަސްޠީނު ރައްޔިތުންގެ މެދުގައި އިޒްރޭލުގެ އުދުވާނާ ބެހޭ ގޮތުން އުފެދިފައިވާ އާޠިފީ ހާލަތުން އެހޫދު ބަރާކްގެ މަޒްމޫނަށް އިތުރު ބުރަދަނެއް މިހާރު ދެވިފައި ވެއެވެ.
ޔަހޫދު ބަރާކް ވިދާޅުވަނީ އިޒްރޭލު ވުޖޫދުގައި އޮތުމަށް ގޮން ޖެހުން ކުރިމަތިވާނީ ބޭރުން ދޭ ހަމަލައަކުންނެއް ނޫނެވެ. އޭނާ ވިދާޅުވަނީ ބޭރުން ހަމަލަދޭ ބަޔަކަށް ވުރެން އިޒްރޭލު މާ ބާރުގަދަ ކަމަށެވެ. އަސްކަރީ ގޮތުންނާއި އިގްތިސާދީ ގޮތުންވެސް މެއެވެ. އީރާން ވިއަސް ޙިޒުބުﷲ ވިއަސް އަދި ޙަމާސްއާއި އިސްލާމީ ޖިހާދާއި ދުޝްމަން އަރަބިންނަށް ވުރެން އިޒްރޭލު އަސްކަރީ ގޮތުން މާ ބާރުގަދަ ކަމެށެވެ. އެހެންނަމަވެސް އޭނާގެ ބިރަކީ އިޒްރޭލުގެ މުޖުތަމައުގައި އޮތް ފިތުނަ ވެރިކަމެވެ.
އެހޫދު ބަރާކް ވަނީ އިޒްރޭލުގެ ޔަދީއޯތު އަހުރަނޯތުގައި 2022 ވަނަ އަހަރުގެ މެއި މަހުގެ 4 އަދި 8 ވަނަ ދުވަހު ސިލްސިލާ ދެ މަޒުމޫނެއްގައި މި ވާހަކަ ތަފްސީލުކޮށް ދެއްވާފައެވެ. އެއީ ޒަޔަނިސްޓް ޔަހޫދީން ގަބޫލުކުރާ އިޒްރޭލުގެ މިނިވަންކަމަށް 74 އަހަރު ފުރުން ފާހަގަކުރުމުގެ ގޮތުން ލިޔުއްވި މަޒްމޫނެކެވެ.
ހަގީގަތުގައިވެސް އިޒްރޭލު މުޖުތަމައަކީ ބައިބައި ވެފައިވާ މުޖުތަމައެކެވެ. އިޒްރޭލު މުޖުތަމައަކީ ހައްދުފަހަނައަޅާފައިވާ ހަރުކަށި އުސޫލީ ސަލަފީ ޔަހޫދީންގެ ބަޔަކާއި އިލްމާނީ، އަދި ލާދީނީ ޔަހޫދީންގެ ދެމެދު ބައިބައިވެފައިވާ މުޖުތަމައެކެވެ.
ބަރާކުގެ މަޒުމޫނުގައި އިޒްރޭލުގެ އިންޓެލިޖެންސް ސާވިސްގެ ކުރީގެ ވެރިއަކާ ހަވާލާ ދެއްވަމުން ވިދާޅުވި ގޮތުގައި އިޒްރޭލު އޮތީ ދާހިލީ ހަނގުރާމައަށް ވެއްޓުމުގެ ތުންފަތް މަތީގައެވެ.
ބަރާކަކީ އިޒްރޭލުގެ ތަޖުރިބާކާރު ސިޔާސީ ލީޑަރެކެވެ. އޭނާގެ ވާހަކައާއި ތަޖުރިބާއަކީ، ބޮލާލައި ޖަހާލެވޭ ވަރަށް ވުރެން ހަރުދަނާ ވާހަކަތަކެކެވެ. އުމުރުން 80 އަހަރުގެ ތަޖުރިބާކާރު ޒަޔަނިސްޓް ލީޑަރު އެހޫދު ބަރާކަކީ ސިޔާސީ އަދި އަސްކަރީ ފިކުރުގެ ބޭފުޅެކެވެ. އޭނާ ވަނީ ޚާރިޖީ އަދި ދާޚިލީ ވަޒީރުކަމާއި، ޕާލަމެންޓް ކެނެސެޓްގެ މެންބަރުކަމާއި، ލޭބަރ ޕާޓީގެ ޗެއަރމަންކަމުގެ އިތުރުން އަދި 8 އަހަރު ވަންދެން ދިފާޢީ ވަޒީރުކަން ކުރައްވާފައެވެ.
ބަރާކުގެ ވާހަކަތަކުން، ޝެއިޚު ބައްސާމާއި ޝެއިޚު އަޙުމަދު ޔާސީންގެ ލިޔުއްވުންތަކަށް ބާރު ދެއެވެ. ތިން ބޭފުޅުންގެ ނަތީޖާއަކީވެސް އެއް ނަތީޖާއެކެވެ. އެހެންނަމަވެސް ސަބަބުތައް ތަފާތެވެ. އިޒްރޭލު ދެމިއެއް ނޯންނާނެއެވެ.
ދުނިޔޭގައި ޔަހޫދީންގެ އާބާދީއަކީ 15 މިލިއަންއެވެ. ޔަހޫދީންގެ ދަރިމައިވާ ނިސްބަތަކީ އެމީހުންގެ މެދުގައި ނުތަނަވަސްވާ މިންވަރަށް މަދު ނިސްބަތެކެވެ. ދެވަނަ ބޮޑު ހަނގުރާމައިގެ ކުރީގައި ޔަހޫދީންގެ އާބާދީ އޮތް މިންރަށް އަދިވެސް އާބާދީ އިތުރު ނުކުރެވުމަކީ ޔަހޫދީންނަށް ބޮޑު މައްސަލައެކެވެ.
