ބާރުގެ ބޭނުންކޮށްގެން އެއްވެސް ސަރަހައްދެއްގައި އަމިއްލައަށް އެއްވެސް ގައުމަކުން ހާލަތު ބަދަލު ކޮށްލުމަށް ދުވަހަކުވެސް ކުއޯޑްގެ ހަތަރު ގައުމުން ފުރުޞަތު ނުދޭނެކަމުގެ ޔަޤީންކަން ދެއްވާކަމުގައި ޖަޕާންގެ ބޮޑު ވަޒީރު ފުމިއޯ ކިޝީޑާ ވަނީ މިއަދު ވިދާޅުވެފައެވެ.
ޖަޕާނުގެ ވެރިރަށް ޓޯކިޔޯގައި މިއަދު ބޭއްވި ކުއޯޑް ސަމިޓް 2022 އަށް ފަހު މީޑިއާއާ މުހާތަބު ކުރައްވާ ޖަޕާނުގެ ބޮޑުވަޒީރު ފުމިއޯ ކިޝީޑާ ވަނީ ވާހަކަފުޅު ދައްކަވާފަ އެވެ.
އޭނާ ވިދާޅުވީ ރަޝިޔާއިން ޔޫކްރެއިންއަށް އަރައިގަތުމަކީ، ބައިނަލްއަގްވާމީ ނިޒާމުގެ ބިންގާ ގުޑުވާލި ހާދިސާއެއް ކަމަށެވެ.
ޓޯކިޔޯގައި ބާއްވާފައިވާ ކުއޯޑްގެ ސަމިޓްގައި ބައިވެރިވެ ވަޑައިގަތީ އެމެރިކާގެ ރައީސް ބައިޑަންއާއި، އިންޑިއާގެ ބޮޑުވަޒީރު މޯދީއާއި، އޮސްޓްރޭލިއާގެ ބޮޑުވަޒީރު އެލަބަނީޒްއެވެ.
ކިޝީޑާ ވިދާޅުވީ ޚާއްސަ ގޮތެއްގައި ބާރުގެ ބޭނުން ކޮށްގެން ހާލަތު ބަދަލުކޮށްލުމަށް އިންޑޯ ޕެސިފިކް ސަރަހައްދުގައި އެއްވެސް ގައުމަކަށް ފުރުސަތެއް ނޯންނާނެ ކަމަށެވެ. ބެލެވޭ ގޮތުގައި މިއީ ޗައިނާއަށް ދެއްވި ޚާއްސަ ސާފު މެސެޖެކެވެ. އަދި ކިޝީޑާ ވިދާޅުވީ، މިނިވަން އަދި ހުޅުވާލެވިފައިވާ އިންޑޯ ޕެސިފިކް ސަރަޙައްދަކީ، މިއަދުގެ ދުނިޔޭގެ ހާލަތުގައި މުހިންމު ކަމެއް ކަމަށެވެ.
