އިންޑިއާއިން އަފްޣާނިސްތާނުގައި ތިބި އެގައުމުގެ ހުރިހާ ޑިޕްލޮމެޓިކް ސްޓާފުން އަނބުރާ ގެންދިޔަ ފަހުން، އިންޑިއާގެ ޚާރިޖީ ވުޒާރާގެ ޖޮއިންޓް ސެކްރެޓަރީ ޖޭ.ޕީ ސިންހް އިސްކޮށް ހުންނަވައިގެން ޓީމެއް ކާބުލްއަށް ފޮނުވައިފިއެވެ. މިއީ މިދިޔަ އަހަރުގެ އޮގަސްޓް މަހު ތާލިބާނުން އެނބުރި އަފްޣާނިސްތާނަށް އައުމަށްފަހު އިންޑިއާގެ ވަފްދަކުން ކާބުލްއަށް ދިޔަ ފުރަތަމަ ފަހަރެވެ.
މި ވަފްދުން ވަނީ ކާބުލްއަށް އިންސާނީ އެހީ ފޯރުކޮށްދިނުމުގެ ކަންކަމާ ބެހޭ ގޮތުން ތާލިބާންގެ އިސް ލީޑަރުންނާ އެކު މަޝްވަރާ ކުރައްވާފައެވެ. އިންޑިއާގެ އެކްސްޓާނަލް އެފެއާޒް މިނިސްޓްރީގެ ޕާކިސްތާން، އަފްޣާނިސްތާން އަދި އީރާން ޑިވިޝަންގެ ހިންގުން ބަލަހައްޓަމުން އަންނަ ސިންހް ވަނީ ތާލިބާނުންގެ ވަގުތީ ޚާރިޖީ ވަޒީރު އާމިރު ޚާން މުއްތަޤީ އާވެސް ބައްދަލު ކުރައްވާފައެވެ. މުއްތަގީ ސިފަކުރެއްވި ގޮތުގައި މި ބައްދަލުވުމަކީ ރަނގަޅު ފެށުމެކެވެ. މއީ އިންޑިއާގެ މަޝްރޫއުތައް އަލުން ފެށުމަށް އެދި ތާލިބާނުންނާއެކު އޮންނަ ޑިޕްލޮމެޓިކް ގުޅުންތަކާއި، ބައިލޭޓަރަލް ވިޔަފާރިއާއި، އިންސާނީ އެހީގެ މައްޗަށް އަލިއަޅުވާލާފައިވާ ބައްދަލުވުމެއް ކަމަށް ތާލިބާނުންގެ ތަރުޖަމާނަކު ވަނީ ވިދާޅުވެފައެވެ.ދޯހާގައި ހުންނަ ތާލިބާން ޖަމާއަތުގެ ސިޔާސީ އޮފީހުގެ ވެރިޔާ ސުހައިލް ޝާހީން ޓައިމްސް އޮފް އިންޑިއާއަށް ވިދާޅުވީ މި ދަތުރުފުޅަކީ ބޭނުންތެރި އަދި މުހިންމު ދަރުރެއް ކަމަށެވެ.
ތާލިބާނުންގެ ތަރުޖަމާނަކު ވިދާޅުވީ، އަފްޣާނިސްތާނުގައި އިންޑިއާއިން ޑިޕްލޮމެޓިކް ގޮތުން ހަރަކާތްތެރިވުމާއި، އަފްޣާނިސްތާނު މީހުންނަށް، ޚާއްސަކޮށް އަފްޣާނިސްތާނުގެ ކިޔަވާކުދިންނާއި ބަލިމީހުންނަށް ކޮންސިއުލަރ ޚިދުމަތްތައް ފޯރުކޮށްދިނުމަށްވެސް މުއްތަޤީ ބާރުއަޅުއްވާފައިވާ ކަމަށެވެ.
އޭނާ ވިދާޅުވީ، އަފްޣާނިސްތާނުގެ އެކްސްޕޯޓް އިތުރުކުރުމަށް އިންޑިއާއިން އެހީތެރިވެދޭނެ ކަމުގެ ޔަޤީންކަން އިންޑިއާއިން ތާލިބާނަށް ދީފައިވާ ކަމަށެވެ. އަދި ޠާލިބާނުންނާއެކު މުޢާމަލާތްތައް އިތުރަށް ފުޅާކުރުމަށް ދެ ފަރާތުން އެއްބަސްވެފައިވާކަމަށެވެ.ތާލިބާނުން އެދިފައި ވަނީ އިންޑިއާއިން އެގައުމުގެ އެމްބަސީ އަލުން ހުޅުވައި، އާދައިގެ މަތިން މަސައްކަތް ކުރަން ފެށުމަށެވެ. މުއްތަގީ ވަނީ އިންޑއިއާއިން އަފްޣާނިސްތާނަށް 50000 މެޓްރިކް ޓަނުގެ ގޮދަން ފޮނުވުމަށް އިންޑިއާ އިން ކޮށްދިން މަސައްކަތަށް ޝުކުރު އަދާކުރައްވާފައެވެ.
