ކްރެޑިޓް ރޭޓިން އެޖެންސީ މޫޑީސް އިންވެސްޓާ ސާވިސް އިން ޕާކސްތާންގެ ކްރެޑިޓް ރޭޓިންގ ދަށް ކޮށްފިއެވެ. އައިއެމްއެފްއާއެކު ޕާކިސްތާނުން ހަދަން އުޅުނު ޑީލް ލަސް ވުމުގެ ސަބަބުން ޕާކިސްތާނަށް އަދިވެސް ބެއިލް އައުޓެއް ވަނީ ނުލިބިފައެވެ.
މޫޑީޒްއިން ވަނީ ޕާކިސްތާންގެ އިގްތިސާދީ ހާލަތު ނެގެޓިވްއަށް ބަދަލުކޮށްފައެވެ. އެފަރާތުން ބުނިގޮތުގައި ނެގެޓިވްއަށް ބަދަލުކުރަން ނިންމި ނިންމުމުގެ އަސްލަކީ، ޕާކިސްތާނުގެ ބޭރު ދަރަނި ދެއްކުމަށް ގިންޖެހުންތަކެއް ކުރިމަތިވެ އިތުރު ބޭރުގެ ފަންޑްސް ހޯދުމުގެ ގާބިލްކަން ނުހުރެދާނެކަމުގެ ނުތަނަވަސްކަމުގެ ސަބަބުންނެވެ. ޑޯން ނޫހުން ރިޕޯޓްކޮށްފައިވާ ގޮތުގައި ޕާކިސްތާންގައި އިންފްލޭޝަން މަތިވުމުގެ ސަބަބުން ޕާކިސްތާނުގެ ބޭރުގެ ދަރަނީގެ ހާލަތު ވަނީ ނުރައްކަލަށް ހުށަހެޅިފައެވެ. މިކަމުގެ ސަބަބުން ފޮރިން އެކްސްޗޭންޖް ރިޒާވް ގެ މިންވަރު ދަށްވެ، ޚާއްސަކޮށް ސިޔާސީ އަދި އިޖުތިމާއީ ނުރައްކަލަށް ހުށަހެޅިފައިވާ މިންވަރު އިތުރުވެފައިވާ ކަމަށް މޫޑީޒްއާ ހަވާލާދީ ނޫހުން ބުންޏެވެ.
ޕާކިސްތާނުގެ މުއައްސަސާތަކާއި ގަވަރނަންސް ހީނަރު ވުމުގެ ސަބަބުން އިގުތިސާދީ މިސްރާބު ވަށައިގެން ނުތަނަވަސްކަން އިތުރުވެގެންދާ ކަމަށް ބުނެފައި ވެއެވެ.
މޫޑީޒްއިން ބުނާ ގޮތުގައި މި އަހަރާއި މިއަންނަ އަހަރުވެސް ދުނިޔޭގެ އިގްތިސާދަށް އަންނަމުންދާ ލޮޅުންތައް ޕާކިސްތާނުން ވަރަށް ބޮޑަށް އިހުސާސް ކުރާނެއެވެ.
ޕާކިސްތާންގެ މިހާރުގެ ބަޖެޓްގެ ދަރަނި އުޅެނީ 13 ބިލިއަން ޑޮލަރަށް ވުރެން މަތީގައެވެ. މީގެ އެއް އަހަރު ކުރިން މި އަދަދު އުޅުނީ 500 މިލިއަން ޑޮލަރާ ގާތްކުރާ ހިސާބެއްގައެވެ.
އައިއެމްއެފްއިން ބުނާ ގޮތުގައި ޕާކިސްތާންގެ ރިޒާވް ވަނީ 9.7 ބިލިއަން ޑޮލަރަށް ދަށްވެފައެވެ.
