މޯލްޑިވްސް ލޭމްޕް ގެ ދަށުން ރާއްޖޭގެ ސްކޫލްތަކަށް ޕަރސަނަލް ޕްރޮޓެކްޓިވް އިކުއިޕްމަންޓް (ޕީ.ޕީ.އީ) އާއި ސާފުކުރުމަށް ބޭނުންކުރާނެ ސާމާނު ރާއްޖޭގެ ސްކޫލްތަކަށް ހަދިޔާ ކޮށްފިއެވެ. މިތަކެތި ޙަވާލުކުރުމަށް މިއަދު ބޭއްވި ރަސްމިއްޔާތެއްގައި މިތަކެއްޗާ ހަވާލުވީ މާލޭގެ ބައެއް ސްކޫލްތަކުގެ ޕްރިންސިޕަލުންނާއި އެ ސްކޫލްތަކުގެ އިސް ބޭފުޅުންނެވެ.
އަންނަ ދިރާސީ އަހަރު ސްކޫލްތައް ހުޅުވުމުގެ ކުރިން މިތަކެތި ސަރުކާރުން ހިންގާ 212 ސްކޫލަށް ފޯރުކޮށްދިނުމުގެ މަސައްކަތް މޯލްޑިވްސް ލޭމްޕް އިން މިހާރު ވަނީ ފަށައިފައެވެ.
މޯލްޑިވްސް ލަރނިންގ އެޑްވާންސްމަންޓް އެންޑް މެޝަރމަންޓް ޕްރޮޖެކްޓް "މޯލްޑިވްސް ލޭމްޕް" އަކީ ގްލޯބަލް ޕަރޓްނަރޝިޕް ފޮރ އެޑިޔުކޭޝަން (ޖީ.ޕީ.އީ) ގެ ހިލޭ އެހީގެ ދަށުން މިނިސްޓްރީ އޮފް އެޑިޔުކޭޝަންގައި ޤާއިމުވެފައިވާ ޕްރޮޖެކްޓެކެވެ. މިނިސްޓްރީ އޮފް އެޑިޔުކޭޝަނާއެކު މި ޕްރޮޖެކްޓުގައި މިނިސްޓްރީ އޮފް ހަޔަރ އެޑިޔުކޭޝަން ޙިއްޞާވެއެވެ. މި ޕްރޮޖެކްޓަށް ލިބިފައިވާ 3.1 މިލިއަން ޔޫ.އެސް ޑޮލަރު (47,802,000 ރުފިޔާ) ގެ ތެރެއިން މި ތަކެތި ގަތުމަށް ޚަރަދުވާނީ 1،538،830 ރުފިޔާ އެވެ.
