ރާއްޖޭގައި ހަށިވިއްކުމުގެ ވިޔަފާރި ކުރަމުންދިޔަ ބިދޭސީ ދެ އަންހެނަކު އިމިގްރޭޝަނުން ޑީޕޯޓްކޮށްލައިފިއެވެ.
އިމިގްރޭޝަނުން މައުލޫމާތު ދީފައި ވަނީ 2 ބިދޭސީންގެ ތެރެއިން އެކަކީ ވޯކް ވިސާގައި ރާއްޖޭގައި އުޅެމުންދިއަ މީހެއް ކަމަށެވެ. އަދި ދެވަނަ މީހާއަކީ ޓޫރިސްޓު ވިސާގައި ރާއްޖެ އައިސްފައިވާ މީހެއް ކަމަށެވެ. މި މައްސަލަ ތަހުޤީޤު ކުރުމަށްފަހު، މި ދެ މީހުން ވެސް ވަނީ މިހާރު ޑީޕޯޓުކޮށްފައި ވާކަމަށް އިމިގްރޭޝަނުން ވަނީ ބުނެފައެވެ. އެއީ އުމުރުން 40 އަހަރާއި 41 އަހަރުގެ ވިއެޓްނާމް އަށް ނިސްބަތްވާ 2 އަންހެނުންނެވެ.
ހަށިވިއްކަމުގެ ވިޔަފާރީގެ އުޅެމުންދާ ބިދޭސީން އަތުލައިގަތުމަށް އިމިގްރޭޝަނުންް ގެންދަނީ ގިނަ އޮޕަރޭޝަންތަކެއް ހިންގަމުންނެވެ. މިގޮތުން މިދިޔަ ޑިސެމްބަރު 5 ވަނަ ދުވަހުވެސް ހަށިވިއްކުމުގެ ވިޔަފާރީގައި އުޅެމުންދިޔަ ބޮޑު ނެޓްވޯކެއް ވަނީ އަތުލައިގަނެފައެވެ.
