ޕާކިސްތާނުގެ ޚައިބަރު ޕަޚްތުންޚްވާގައި އާ ޕޯލިއޯ ކޭސްތަކެއް ފެނިއްޖެއެވެ. ނިމިދިޔަ 2024ގައި، ރިޕޯޓުކޮށްފައިވާ ޖުމުލަ ޕޯލިއޯ ކޭސްތަކުގެ އަދަދު 69 އަށް އަރާފައިވާ ކަމަށް ނޭޝަނަލް އިންސްޓިޓިއުޓްސް އޮފް ހެލްތު އިން ނެރުނު ބަޔާނެއްގައި ބުނެ އެވެ.
ދުނިޔޭގައި އެންމެ ފަހުން ޕޯލިއޯ އާންމު ވެފައިވާ ދެ ގައުމަކީ، ޕާކިސްތާނާއި އަފްޣާނިސްތާނެވެ.
ޕޯލިއޯ ކޮންޓްރޯލު ކުރުމަށް މަސައްކަތްތަކެއް ކުރި ނަމަވެސް، ސަލާމަތީ މައްސަލަތަކާއި، ވެކްސިން ޖެހުމަށް އާންމުން ފަސްޖެހުމާއި، ގޯސް މައުލޫމާތު ފެތުރުން ފަދަ ގޮންޖެހުންތަކުގެ ސަބަބުން ޕޯލިއޯއާ ދެކޮޅަށް ކުރާ މަސައްކަތަށް ކުރިއެރުންތަކެއް ނުލިބި ވަނީ މަޑުޖެހިފައެވެ.
ޖެނުއަރީ މަހުގެ ހަތް ވަނަ ދުވަހު ވެސް އައު ކޭސްތަކެއް ޚައިބަރު ޕަޚުތޫން ޚުވާއިން ފެނިފައިވެއެވެ. މިއީ 2024 ވަނަ އަހަރަށް އެ ޑިސްޓްރިކްޓުން ޕޮޒިޓިވްވި 5 ވަނަ ކޭސްއަށް އިތުރުވި ކޭސް އެކެވެ.
މިދިޔަ އަހަރުން ފެށިގެން ޕާކިސްތާނުން ޕޯލިއޯ ޖައްސާ ޑަބްލިއުޕީވީ1 އަލުން ފެންނަން ފެށުމުން އެކަމަށް ފިޔަވަޅު އަޅަން ފަށާފައި ވެއެވެ.
މިދިޔަ އަހަރު ފެނުނު ޕޯލިއޯއަށް ޕޮޒިޓިވް ވި، ބަލޫޗިސްތާނުން 27 މީހުންއަދި ޚައިބަރު ޕަޚުތޫންޚުވާއިން 21 މީހުން އަދި ސިންދުން 19 މީހުންނެވެ. އޭގެ އިތުރުން ސިންދު، އަދި ޕަންޖާބާއި އިސްލާމްއާބާދުން ކުރެ ކޮންމެ ތަނަކުން މީހެކެވެ.
ޕޯލިއޯ އަކީ އެއްވެސް ފަރުވާއެއް ނެތް ޕެރެލައިޒް ކުރާ ބައްޔެކެވެ. މި ބިރުވެރި ބައްޔަށް ދިފާއީ ބާރު ފޯރުކޮށްދިނުމަށް ފަސް އަހަރުން ދަށުގެ ހުރިހާ ކުދިންނަށް ވެކްސިންގެ ޑޯޒްތަކެއް ދީ، ފަސް އަހަރުން ދަށުގެ ހުރިހާ ކުދިންނަށް ވެކްސިން ގެ ރޫޓިން ޝެޑިއުލް ފުރިހަމަ ކުރުމަކީ ކޮންމެހެން ބޭނުންތެރި ކަމެކެވެ.
