އަފްޣާނިސްތާނުގެ ދަރިވަރުންނަށް ޕާކިސްތާނުން 4500 ސްކޮލަޝިޕް ދޭން އިއުލާން ކޮށްފިއެވެ. މި ސްކޯލާޝިޕްތަކަކީ ހުރިހައި ޚަރަދެއް ދޭ ގޮތަށް ކަނޑައަޅާފައިވާ 4،500 ސްކޮލަޝިޕެވެ. ކިޔެވުމަށް ހުޅުވާލާ ދާއިރާތަކަކީ، މެޑިސިން، އިންޖިނިއަރިން، ދަނޑުވެރިކަން، އަދި މަތީ ތައުލީމުގެ ދާއިރާތަކެވެ.
އަފްޣާން ދަރިވަރުންނަށް ގްރެޖުއޭޝަން، ޕޯސްޓް ގްރެޖުއޭޝަން އަދި ޕީއެޗްޑީ އަށް ކިޔެވުމަށް ސްކޮލަޝިޕް ފޯރުކޮށްދިނުމަކީ ޕާކިސްތާނުން ކުރަމުންދާ ކަމެކެވެ.
އޮންލައިން ޓެސްޓްތަކާއި އިންޓަވިއުތަކުން ކުދިން ހޮވާއިރު، ދެފުށް ފެންނަ މެރިޓް ބޭސްޓް ސެލެކްޝަން ޕްރޮސެސްއަކުން ކުދިން ހޮވާނެ ކަމަށް ބުނެފައި ވެއެވެ.
މުޖުތަމައުގެ ތަރައްގީގައި އަންހެނުންގެ މުހިންމު ދައުރަށް ބާރުއަޅައި ޕާކިސްތާނުން ވަނީ މި ސްކޮލަޝިޕްތަކުގެ 33 ޕަސެންޓް އަންހެން ދަރިވަރުންނަށް ހާއްސަކޮށްފައެވެ.
އަފްޣާނިސްތާނުގެ ދަރިވަރުންނަށް ތައުލީމީ ފުރުސަތުތައް ފޯރުކޮށްދޭއިރު މީގެ ކުރިން އަހަރުތަކުގައި 3،000 އައްލާމާ އިގްބާލް ސްކޮލަޝިޕް ވެސް އަފްޣާން ކުދިންނަށް ޕާކިސްތާނުން ދީފައި ވެއެވެ.
