ރާއްޖޭގެ ތަރައްގީއަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ދެއްވާ އަހަންމިއްޔަތުކަމަށް ތައުރީފްކުރައްވާ ރާއްޖޭގެ ދެމެހެއްޓެނިވި ތަރައްގީއަށް ޗައިނާގެ އެހީތެރިކަން ލިބޭނެކަމުގެ ޔަގީންކަން ޗައިނާގެ ސީޕީސީ ސެންޓްރަލް ކޮމިޓީގެ ޕޮލިޓިކަލް ބިއުރޯގެ މެންބަރު، އޮފީސް އޮފް ދަ ސެންޓްރަލް ކޮމިޝަން ފޯ ފޮރިން އެފެއަރޒްގެ ޑިރެކްޓަރ، ޚާރިޖީ ވަޒީރު ހިޒް އެކްސެލެންސީ ވާންގް ޔީ، ދެއްވައިފިއެވެ.
ޗައިނާގެ ހާރިޖީ ވަޒީރު މިޔަގީންކަން ދެއްވީ މިއަދު ހަވީރު ރައީސްގެ އަރިހަށް ކުރެއްވި އިހްތިރާމުގެ ޒިޔާރަތުގައެވެ. މި ބައްދަލުވުން އޮތީ ހުކުރު ދުވަހުގެ ހަވީރު ރައީސް އޮފީހުގައެވެ.
މިބައްދަލުވުމުގައި ރައީސް ވަނީ ވަޒީރު ވާންގް ޔީއަށް މަރުހަބާ ވިދާޅުވެ، ދިވެހިރާއްޖޭގައި ހޭދަކުރައްވާ ވަގުތުތަކަކީ އުފާވެރި ވަގުތުތަކަކަށްވުމަށް އެދިވަޑައިގެންނެވިއެވެ. އަދި، ދެގައުމުގެ މެދުގައި އޮތް ގާތްގުޅުން ފާހަގަކުރައްވައި ޗައިނާއިން ދިވެހިރާއްޖެއަށް ދެއްވަމުން ގެންދަވާ އެހީތެރިކަމާ އެއްބާރުލުން ޝުކުރުވެރިކަމާއެކު އެމަނިކުފާން ފާހަގަކުރައްވާފައިވެއެވެ. އަދި، ނިމިދިޔަ އަހަރުގެ ޖަނަވަރީގައި ރައީސް ޗައިނާއަށް ކުރެއްވި ރަސްމީ ދަތުުރުފުޅަކީ މި ގުޅުން އިތުރަށް ބަދަހިވެގެންދިޔަ ދަތުރުފުޅެއް ކަމުގައިވެސް އެމަނިކުފާނު ފާހަގަކުރެއްވިއެވެ.
މީގެއިތުރުން އެމަނިކުފާނު ވަނީ ހިނގަމުންދާ މަޝްރޫޢުތަކާއި ދެގައުމުގެ މެދުގައި އެއްބަސްވެވިފައިވާ ތަރައްގީގެ މަޝްރޫއުތައް އަވަސްކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި، ގެދޮރުވެރިކަމާއި މަގުހެދުމުގެ މަޝްރޫއުތަކަކީ ދިވެހި ރައްޔިތުންނަށް އެންމެ މުހިންމު މަޝްރޫއުތައްކަމަށާއި، އެ މަޝްރޫޢުތަކަށް އިސްކަންދިނުމުގެ މުހިންމުކަމުގެ މައްޗަށް ރައީސްގެ ވާހަކަފުޅުގައި އަލިއަޅުއްވާލެއްވިއެވެ. އިގުތިސާދީ ހާލަތު ރަނގަޅު ކުރުމަށް މަސްވެރިކަމާއި ދަނޑުވެރިކަން ތަރައްގީ ކުރުމަށް ވެސް ޗައިނާގެ އެހީތެރިކަން ބޭނުންވާކަމަށް ރައީސް ވަނީ ވާންގް ގެ އަރިހުން އެދިވަޑައިގެންފައެވެ.
މި ބައްދަލުކުރެއްވުމުގައި ހާރިޖީ ވަޒީރު ވާންގް ޔީގެ ވާހަކަފުޅުގައި ދެގައުމުގެ ގުޅުން ބަދަހިކުރެއްވުމަށް ރައީސް ދެއްވާ އަހަންމިއްޔަތުކަމަށް ތައުރީފްކުރެއްވިއެވެ. އަދި، ރައީސް އަކީ ޗައިނާގެ ގާތް ރަހުމަތްތެރިއެއް ކަމަށާއި ޗައިނާއަށް އިތުބާރުކުރެވޭ ބައިވެރިއެއް ކަމުގައިވެސް އެމަނިކުފާނު ވިދާޅުވިއެވެ.
މީގެއިތުރުން ހާރިޖީ ވަޒީރު ވަނީ ޗައިނާގެ ކުންފުނިތަކުން ރާއްޖޭގައި ހިންގަމުންދާ މަޝްރޫއުތައް އަވަސްކުރުމަށް ބާރުއަޅުއްވާނޭކަމަށްވެސް ވިދާޅުވެފައެވެ. އަދި ރާއްޖެއިން "ވަން ޗައިނާ" ޕޮލިސީއަށް ދެމުންދާ އިސްކަން ފާހަގަކުރައްވަމުން، ރާއްޖެ- ޗައިނާ ގުޅުމަކީ ގައުމުތަކުގެ ކުޑަ ބޮޑު މިނަށް ބެލުމެއްނެތި ގުޅިގެން ތަރައްގީއާއި ފުދުންތެރިކަން ހޯދޭނެކަމުގެ އަލިގަދަ ހެއްކެއްކަމުގައިވެސް އެމަނިކުފާނު ވިދާޅުވިއެވެ.
މި ބައްދަލުކުރެއްވުން ނިންމަވާލައްވަމުން ދެ ބޭފުޅުންވެސް ވަނީ ރައީސް ޗައިނާއަށް ކުރެއްވި ރަސްމީ ދަތުރުފުޅުގައި އެއްބަސްވެވުނު "ޗައިނާ މޯލްޑިވަސް ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އެއްބަސްވުން ތަންފީޒުކުރުމަށާއި މަލްޓިލޭޓަރަލް މަންސަތަކުގައި ދެގައުމުގެ އެއްބާރުލުން އިތުރަށް ހަރުދަނާކުރުމަށް އެއްބަސްވެވަޑައިގެންފައެވެ.
