ނިއުދިއްލީގައި ހުންނަ އިޒްރޭލުގެ އެމްބަސީން ބުރާސްފަތި ދުވަހު ބުނީ އޮގަސްޓް 4-6 އަށް ނިއު ދިއްލީގައި ބާއްވާ 17 ވަނަ "އެވްރިތިންގް އަބައުޓް ވޯޓާ އެކްސްޕޯ 2022" ގައި އިންޑިއާ އާއި އިޒްރޭލުން ގުޅިގެން ހަރަކާތްތެރިވާނެ ކަމަށެވެ. ފެނުގެ ދާއިރާއިން އިސްރާއީލާއި އިންޑިއާއާ ދެމެދު މިހާރު ކުރިއަށްދާ އެއްބާރުލުން އިތުރަށް ވަރުގަދަވެގެން ދާނެ ކަމަށްވެސް ލަފާ ކުރެވޭ ކަމަށް ބުނެފައި ވެއެވެ.
މި އެކްސްޕޯގައި އިޒްރޭލުގެ މަތީ ފެންވަރުގެ ހަތަރު ތަޖުރިބާކާރުން ބައިވެރިވާނެ އެވެ. އެ ތަޖުރިބާކާރުން ބާއްވާ ސެޝަންގައި އެމީހުންގެ މަޢުލޫމާތު ޙިއްޞާ ކުރާނީ އިސްރާއީލުން ގެންގުޅޭ ފެން މެނޭޖު ކުރުމާ ގުޅޭ މޮޑެލްއާ ބެހޭ ގޮތުންނާއި ފެނާ ބެހޭ ޕޮލިސީއާއި ފެނުގެ ޓެކްނޮލޮޖީއާއި ރިސާޗް އެންޑް ޑިވެލޮޕމެންޓް އިމްޕްލިމެންޓޭޝަން އަދި އިޒްރޭލް-އިންޑިއާ ވޯޓަރ ޕާޓްނަރޝިޕްއާ ބެހޭ ގޮތުންނެވެ. އިޒްރޭލަކީ ކިލަނބުވާ ފެނުގެ 90 ޕަސަންޓް ރިސައިކަލް ކުރާ ގައުމެކެވެ. އެހްންވެ އިޒްރޭލަކީ މި ރޮނގުން ވޭސްޓް ވޯޓާ ރިސައިކަލް ކުރުމުގައި ދުނިޔޭގެ އެއްވަނަ ލީޑަރެވެ.
ރަނގަޅު މެނޭޖްމަންޓާއި ހައި ޓެކް ޑިވެލޮޕްމަންޓާއި ޕަބްލިކް އެޑިއުކޭޝަން ހިމެނޭ ގޮތަށް ފެން ބޭނުންކުރުމުގައި އިޒްރޭލުން ފުރިހަމަ ވިސްނުމެއް ގެންގުޅޭކަމަށާއި އިޒްރޭލުން ވަނީ ފެނުގެ ރޮނގުން ދުނިޔޭގެ ލީޑަރަކަށް ވެފައި ކަމަށް އިޒްރޭލު އެމްބަސީން ނެރުނު ބަޔާނުގައި ބުންޏެވެ.
މި ހަރަކާތުގެ އެންމެ ފާހަގަކޮށްލެވޭ އަނެއް ކަމަކީ އިޒްރޭލުގެ ނެޝަނަލް ޕެވިލިއަންގައި އެންމެ ފަހުގެ ފެނުގެ ޓެކްނޮލޮޖީތައް ދައްކާ ލުމަށް އިޒްރޭލުގެ މަޝްހޫރު 8 ފެން ކުންފުންޏެއް ބައިވެރިވާނެ އެވެ.
އިޒްރޭލު އެމްބަސީގެ ނުސްބަޔާނުގައި ވާގޮތުން މި ބައިވެރިވާ ކުންފުނިތަކުން ވާހަކަ ދައްކައި ސާމްޕަލްތައް ދެއކުމަށް ހަމަޖެހިފައިވަނީ ވޯޓަރ ޑިސްޓްރިބިއުޝަން އެންޑް މެނޭޖްމަންޓް، ފިލްޓްރޭޝަން، ލީކް ޑިޓެކްޝަން، ވޭސްޓް ވޯޓަރ ޓްރީޓްމަންޓް، ޑީސެލިނޭޝަން އަދި ވޯޓަރ ސެކިއުރިޓީއާއި ގުޅުންހުރި ސޮލިއުޝަންތަކާ ބެހޭ ގޮތުންނެވެ.
އިޒްރޭލަކީ ދުނިޔޭގައި އެމްބަސީއެއްގައި އެންމެ ފުރަތަމަ ވޯޓާ އެޓާޗޭއެއް ބެހެއްޓި ގައުމެވެ. ނިއުދިއްލީގައި ހުންނަ އިޒްރޭލް އެމްބަސީގައި މިލިޓަރީ އެޓާޗޭއާއި ކޮމާސް އެޓާޗޭގެ އިތުރުން ވޯޓާ އެޓާޗޭއެއްވެސް ހުރެއެވެ.
