ޕާކިސްތާންގެ ޚާރިޖީ ވަޒީރު ބިލާވަލް ބުއްޓޫ ޒަރްދާރީ ވަނީ، ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ)ގެ މެމްބަރު ހުރިހާ ގައުމެއްގެ ޚާރިޖީ ވަޒީރުންނާއެކު ތަޝްކެންޓްގައި ބައިލޭޓަރަލް ބައްދަލުވުންތަކެއް ބާއްވަވާފަ އެވެ.
މި ބައްދަލުވުމަށް ވަޑައިގަތް އިންޑިއާގެ އެސް ޖައިޝަންކަރއާއެކު ބައްދަލު ކުރެއްވުމަށް ކުރިން ހަމަޖެހިފައެއް ނުވެއެވެ.
އެހެންނަމަވެސް، ރަޝިޔާގެ ޚާރިޖީ ސަރްގެއި ލަވްރޯވްއާއެކު ޕާކިސްތާންގެ ޚާރިޖީ ވަޒީރު ބައިލެޓްރަލް ބައްދަލު ވުމެއް ބާއްވަވާފައި ނުވާތީ އެކަމާ ސުއާލު އުފައްދާފައި ވެއެވެ.
ޕާކިސްތާންގެ ޚާރިޖީ ވުޒާރާއިން މީގެ ކުރިން ނެރުނު ބަޔާނެއްގައި ބުނީ އިންޑިއާ ފިޔަވައި ޗައިނާ، ރަޝިއާ އަދި އެސްސީއޯގެ އެހެން ގައުމުތަކުގެ ހާރިޖީ ވަޒީރުންނާއެކު ފޮރިން މިނިސްޓަރު ބިލާވަލް ބައިލޭޓަރަލް ބައްދަލުވުންތައް ބާއްވަވާނެ ކަމަށެވެ. ނަމަވެސް އެފަދަ ބައްދަލލުވުމެއް ސަރްގެއިއާއެކު އފެނިފައެއް ނުވެއެވެ. އެކަމަކު ބިލާވަލް ވަނީ މެމްބަރު އެހެން ހުރިހާ ގައުމެއްގެ ހާރިޖީ ވަޒީރުންނާ ބައްދަލު ކުރައްވާފައެވެ.
ޕާކިސްތާންގެ ދަ އެކްސްޕްރެސް ޓްރިބިއުން ނޫހަށް މައުލޫމާތު ދިން މަސްދަރުތަކުން ބުނީ ޕާކިސްތާނާއި ރަޝިއާގެ ހާރިޖީ ވަޒީރުންގެ ބައްދަލުވުމެއް ވަގުތީ ގޮތުން ތާވަލް ކޮށްފައި އޮތީ ފަހުގެ ވަގުތަކަށް ކަމަށެވެ. އަދި ލަވްރޯވް ތަޝްކެންޓް އިން ފުރާވަޑައިގަތުން ވަނީ ލަސް ކުރައްވާފައި ކަމަށެވެ.
އެސްސީއޯގެ ޚާރިޖީ ވަޒީރުންނަށް ބޭއްވެވި ރޭގަނޑުގެ ފަރިއްކޮޅެއްގައި ބިލަވާލް އާއި ލަވްރޯވް ނުރަސްމީ ގޮތެއްގައި މުއާމަލާތް ކުރެއްވި ކަމަށާއި ނަމަވެސް ވަގުތުގެ ދަތިކަމުގެ ސަބަބުން ދެގައުމުގެ ދެމެދުގައި އެއްވެސް ބައްދަލުވުމެއް އެޖެންޑާ ކުރެވެން ނެތް ކަމަށް އެ ދެ ބޭފުޅުން ވިދާޅުވި ކަމަށްވެސް ރިޕޯޓް ކޮށްފައިވެއެވެ.
