ސެމީކޮންޑަކްޓަރ އިންޑަސްޓްރީއަށް ހިތްވަރު ދިނުމަށް އެމެރިކާގެ ގާނޫނު ހަދާ މަޖިލީހުން ގާނޫނު ފާސްކުރުމުގެ ކުރިން އެމެރިކާގެ ގާނޫނުހަދާ މަޖިލީހުގެ ރައީސްގެ ފިރިކަލުން ސެމީކޮންޑަކްޓަރ ކުންފުންޏެއްގެ ގިނަ ހިއްސާތަކެއް ގަތްކަން ބޭޒާރުވެގެން އާންމުންނާއި ގާނޫނުހަދާ މަޖިލީހުގެ މެމްބަރުންގެ ނުރުުން އަމާޒު ވެއްޖެއެވެ.
އެމެރިކާއިން ޗިޕްސް ބިލްގެ ނަމުން ފާސްކޮށްފައިވާ ގާނޫނަކީ ޗައިނާއާ ވާދަޖެހުމަށް އެމެރިކާގެ ކޮމްޕިއުޓަރ ޗިޕް އުފެއްދުން ކުރީގައި ބޭވުމަށް އެދާއިރާއަށް 50 ބިލިއަނަށް ވުރެން ގިނަ ފައިސާ ޕަންޕް ކުރުމަށް ހުށަހަޅާ ބިލެކެވެ.
ހައުސް އޮފް ރެޕްރެޒެންޓެޓިވްސްގެ ރައީސާ ނެންސީ ޕެލޯސީގެ ފިރިކަލުން ޕޯލް ޕެލޯސީ ވަނީ ސެމީ ކޮންޑަކްޓަރ އުފައްދާ އެންވީޑިއާ ކުންފުނީގެ 20 ހާސް ހިއްސާ އެއްމިލިއަންއާއި ފަސް މިލިއަންއާ ދެމެދުގެ އަދަދެއް ހޭދަކުރައްވައި ބައްލަވައިގެންފައެވެ.
އޭނާ މި މުއާމަލާތް ހިންގަވފައި ވަނީ ގާނޫނު ހަދާ މަޖިލީހުގައި މިބިލް ފާސްވަމުން ދަނިކޮށެވެ.
މި މައސަލަ ބެލުމަށް ކޮންގްރެސްގެ މެމްބަރުންވެސް ގޮވާލާފައި ވެއެވެ. ނަމަވެސް ޕައުލް ޕެލޯސީ ވަނީ އޭނާގެ ހިއްސާ ނުއަގުގައި އިއްޔެ ވިއްކަވާފައެވެ. މި މުއާމަލާތުން އޭނާއަށް 3.5 މިލިއަން ޑޮލަރުގެ ގެއްލުން ވާނެ ކަމަށް ބެލެވެއެވެ.
