އެމެރިކާގެ ހައުސް ސްޕީކަރ ނޭންސީ ޕެލޯސީ ސިންގަޕޫރަށް ވަޑައިގެންފިއެވެ. . މި ދަތުރުފުޅުގައި ޕެލޯސީ ސިންގަޕޫރުގެ ރައީސް ހަލީމާ ޔަޢުޤޫބާއި ބޮޑުވަޒީރު ލީ ސިއެން ލޫންގްއާ ބައްދަލުކުރައްވާނެ އެވެ. އަދި ކެބިނެޓްގެ ގިނަ ވަޒީރުންނާވެސް ބައްދަލުކުރައްވާނެ ކަމަށް ސިންގަޕޫރުގެ ޚާރިޖިއްޔާގެ ތަރުޖަމާނަކު ވިދާޅުވިއެވެ.
ސިންގަޕޫރުގައި ހުންނަ އެމެރިކަން ޗެމްބަރ އޮފް ކޮމާރސްއާއެކު ކޮކްޓެއިލް ރިސެޕްޝަނެއްގައި އެކަމަނާ ބައިވެރިވެވަޑައިގަންނަވާނެ ކަމަށް ބެލެވެއެވެ. ޕެލޯސީގެ ދަތުރުފުޅަށް މީޑިއާއަށް އެކްސަސް ވެވޭނެ ގޮތެއް ނެތެވެ. އަދި ދަތުރުފުޅުގެ ކަންކަން ވަނީ ވަރަށް ބޮޑަށް ސިއްރުކޮށްފަ އެވެ.
ހަފްތާ ބަންދުގައި ޕެލޯސީ ނެރުއްވި ބަޔާނެއްގައި ވިދާޅުވީ، ވިޔަފާރިއާއި، ކޮވިޑް-19ގެ ބަލިމަޑުކަމާއި، މޫސުމަށް އަންނަ ބަދަލުތަކާއި، ސަލާމަތީ އަދި ޑިމޮކްރެޓިކް ގަވަނަންސްއާ ގުޅޭގޮތުން މަޝްވަރާ ކުރެއްވުމަށް އެކަމަނާގެ އޭޝިއާ ދަތުރުފުޅުގައި މެލޭޝިޔާ، ދެކުނު ކޮރެއާ އަދި ޖަޕާނަށްވެސް ވަޑައިގަންނަވާނެ ކަމަށެވެ.
ޕެލޯސީ ޓައިވާނަށް ޒިޔާރަތް ކުރައްވާނެކަން ކަށަވަރު ކޮށްދީފައެއް ނުވެއެވެ.
މި ދަތުރަކީ ބެއިޖިންގއާ އެމެރިކާއާ ދެމެދު ޓައިވާނަށް އެކަމަނާ ވަޑައިގަތުމާ ގުޅޭ ގޮތުން ދެބަސްވުމެެއް އުފެދިފައި ވަނިކޮށް ފަށްޓަވާފައިވާ ދަތުރެކެވެ.
ޗައިނާއިން ބުނެފއި ވަނީ ޕެލޯސީ ޓައިވާނަށް ވަޑައިގަންނަވަނީނަމަ ޗައިނާއިން އަސްކަރީ ފިޔަވަޅެއް އެޅުންފަދަ ހުރިހައި ވަސީލަތެއް ބޭނުން ކުރުމުގައި ފަހެއް ނުޖެހޭނއެވެ.
