ފަލަސްތީނުގެ ގައިދީއަކު ޖަލުގައި އިޒްރޭލުގެ އަންހެން ގާޑަކު އޭނާގެ ޖިންސީ އެދުން ފުއްދުމަށް އަޅެއްގެ ގޮތުގައި ގެންގުޅުނު ކަމަށ ްބުނާ މައްސަލަ ތަހުގީގު ކުރާނެ ކަމަށް އިޒްރޭލުގެ ބޮޑު ވަޒީރު ޔާއީރް ލެޕިޑް ވިދާޅުވެއްޖެއެވެ. އޭނާ ވިދާޅުވީ "ޓެރަރިސްޓަކު" އިޒްރޭލު "ސިފައިންގެ މީހަކު އަޅެއްގެ ގޮތގައި ގެންގުޅުމަކީ ގަބޫލު ކުރެވޭނެ ކަމެއް ނޫން" ކަމަށެވެ.
މި އަންހެން ގާޑު މީހާއާއި އޭނާގެ ވަކީލު އިޒްރޭލުގެ ޗެނަލް12ގައި ބުނެފައި ވަނީ އޭނާ ތަކުރާރުކޮށް ފަލަސްތީނު ގައިދީ ރޭޕްކުރި ކަމަެވެ. އަދި އޭނާއަށް ކައުންސިލިން ހޯދަން ޖެހުނު ކަމަށެވެ.
އިޒްރޭލުގެ އެންމެ މަތީ ސެކިއުރިޓީ ޖަލު ގިލްބޯއާ ޖަލުގައި ތިބި ގައިދީންގެ ފަރާތުން އަންހެން ގާޑުންނަށް އަނިޔާ ލިބެމުންދާ ކަމަށް ބުނެ އިޒްރޭލުގެ މީޑިއާގައި އަބަދުވެސް ރިޕޯޓް ކުރެއެވެ.
އެ ޖަލުގެ ހިންގުން އާ މައްސަލަތަކެއްފެންމަތިވީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ފަލަސްތީނުގެ ހަ ގައިދީއަކު ގިލްބޯއާގެ ނަރުދަމާ ތެރޭން ލައިގެން ބޭރުވުމުން ބައިނަލްއަގްވާމީ މީޑިއާގައި އެވާހަކަ ރިޕޯޓް ކުރުމުންނެވެ.
ފާއިތުވީ އަހަރެއްހާ ދުވަހުގެ ތެރޭގައި އިސްރާއީލުގެ ބައެއް މީޑިއާގައި ގިލްބޯއާ ޖަލުގައި ޖިންސީ އެދުންފުއްދުމަށް އަޅުން ގެންގުޅޭ ވާހަކަ "ޕިމްޕިންގް އެފެއާ" ގެ ނަމުން ރިޕޯޓް ކޮށްފައި ވެއެވެ.
މި ކަމުގައި ޖަލު ބަލަހައްޓާ ޔަހޫދީގާޑުން ފައިސާ ނަގައިގެން އިޒްރޭލު އަންހެން ގާޑުން ގައިދީންނާ ހަވާލު ކުރާ ކަމަށް ވެއެވެ.
މިދިޔަ ހަފުތާގައި ގިލްބޯއާގެ ކުރީގެ ގާޑު މީހާ އޮންލައިންކޮށް ހެކިބަސް ޕޯސްޓްކޮށް ބުނީ ފަލަސްތީނުގެ ގައިދީއަކު ތަކުރާރުކޮށް އޭނާ ރޭޕްކުރި ކަމަށެވެ. އަދި ޖަލުގެ ވެރިން ގައިދީއާ އޭނާ "ހަވާލުކުރި" ކަމަށާއި އޭނާ ގެންގުޅުނީ "ޕްރައިވެޓް ސެކްސް ސްލޭވް" އެއްގެ ގޮތުގައި ކަމަށެވެ.
