މިދިޔަ މަހު ކާބުލްއަށް ދިން ވައިގެ ހަމަލާގައި މަރާލާފައިވާ އަލްޤައިދާގެ ލީޑަރު އައިމަން އަލްޒަވާހިރީގެ ހަށިގަނޑު ފެނިފައި ނުވާތީ ތަހުގީގުތައް ކުރިއަށް ގެންދާ ކަމަށް ތާލިބާނުން ބުނެފި އެވެ. އެމެރިކާއިން ބުނާ ގޮތުގައި އެމީހުން ޒަވާހިރީ މަރާލާފައި ވަނީ ކުރިއަރާފައިވާ ބްލޭޑް މިސައިލެއް ފޮނުވައިގެންނެވެ.
އެމެރިކާގެ އޮފިޝަލުން ސިފަ ކުރިގޮތުގައި މިއީ މީގެ ދިހަ އަހަރަށް ވުރެ ގިނަ ދުވަސް ކުރިން އެމެރިކާގެ ނޭވީ ސީލްސްއިން އަލްގައިދާ ލީޑާ އުސާމާ ބިން ލާދިންގެ ގަޔަށް ބަޑިޖަހައި މަރާލި ފަހުން އަލްގައިދާއަށް ދީފައިވާ އެންމެ ބޮޑު ގެއްލުމެވެ. ކާބުލްގައި އޭނާ މަރާލުމުން ތާލިބާނުން އޭނާއަށް ޙިމާޔަތް ދީފައި ވަނީ ތޯއާ މެދު އެމެރިކާއިން ސުއާލު އުފައްދާފައި ވެއެވެ.
މިސްރުގެ މެޑިކަލް ޑޮކްޓަރެއް ކަމަށްވާ ޒަވާހިރީ އަކީ 2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާއަށް ދިން ހަމަލާތަކުގައި ވަރަށް ގާތުން ބައިވެރިވެފައިވާ މީހެއްކމަށް އެމެރިކާއިން ލޭބަލް ކޮށްފައިވާ މީހެކެވެ.
ޒަވާހިރީ މަރާލަން ހަމަލަ ދިނުމާއެކު ތާލިބާނުން ވަނީ އޭނާ ދިރިއުޅުނުގެ ވަށައިގެން ރަބަރު ދަމައި ފޮރުވައި ނޫސްވެރިންނަށް އެހިސާބަށް ނުދެވޭ ގޮތް ހަދާފައެވެ.
އަދި އޭނާގެ އާއިލާވެސް އެސާހިތަކުން އެތަނުން ބޭރުކޮށްލިކަމަށް މީޑިއާއިން ބުނެފައި ވެއެވެ. ނަމަވެސް ޒަވާހިރީގެ ގަބުރު ފެނިފައި ނުވާކަމަށް ތާލިބާންގެ ތަރުޖަމާން ޒަބީހުﷲ މުޖާހިދު މިއަދު އިއުލާން ކުރުމާ ގުޅިގެން މިހާރު އިތުރު ސުއާލުތަކެއް ކުރިމަތިވީއެވެ.
