ނުރައްކާތެރި ކެމިކަލް ހުރި ކަމަށް ޝައްކު ކުރެވޭތީ ތަދުކަނޑުވަން ބޭނުންކުރާ 2 ބޭހެއް ރާއްޖެ އެތެރެކޮށް ވިއްކުން ވަގުތީ ގޮތުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާ ކޮށްފިއެވެ.
އެމްއެފްޑީއޭއިން މަނާކުރި 2 ބޭހަކީ 'މެފްނަކް ސަސްޕެންޝަން' އަދި 'އެކްސެލް މެފްނަމިކް އެސިޑް ސަސްޕެންޝަން' ނަމަކަށް ކިޔުނު 2 ބޭހެވެ.
މި 2 ބޭސް އެތެރެކޮށް ވިއްކުން ވަގުތީ ގޮތުން މަނާކުރީ, ނުރައްކާތެރި ދެ ކެމިކަލް ކަމުގައިވާ ޑައިތައިލިން ގްލައިކޯލް އަދި އިތައިލީން ގްލައިކޯލްއަށް މި ދެ ބޭސް ޕޮޒިޓިވް ވެފައިވާތީއެވެ.
އެމްއެފްޑީއޭއިން ދަނީ މި 2 ބޭހުގެ ކޮންފަރމޭޓްރީ ޓެސްޓު ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުންނެވެ.
އެމްއެފްޑީއޭގެ ތަހުގީގުތައް ނިމެންދެން މި 2 ބޭސް އެއް ވެސް ފަރާތަކަށް ނުވިއްކާ, އެހެން ބޭސްތަކާ ވަކިން ރައްކާ ކޮށްފައި ބެހެއްޓުމަށް އެ އޮތޯރިޓީއިން ވަނީ އިލްތިމާސްކޮށްފައެވެ.
