އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރެއިން ތިނަދޫ ސިޓީ ޕޮލިހުގެ ބެލުމުގެ ދަށުގައި ހުރި ބަނގުރާ ނައްތާލައިފިއެވެ.
ފުލުހުން ބުނީ މިމަހު 26 ވަނަ ދުވަހު ނައްތައިލާފައިވަނީ މި އަހަރުގެ ފެބުރުވަރީ މަހުގެ 2 ވަނަ ދުވަހުން ފެށިގެން ނޮވެމްބަރު މަހުގެ 10 ވަނަ ދުވަހާ ހަމައަށް ކާޑެއްދޫ އެއާޕޯޓަށް ފުރަން ދިޔަ ފަތުރުވެރިންގެ އަތުން ހިފަހައްޓާފައިވާ 129 ފުޅި ބަނގުރަލާއި ހަތަރު ދަޅު ބިޔަރު އަދި ފަރެސްމާތޮޑާ އެއާޕޯޓަށް ފުރަންދިޔަ ފަތުރުވެރިއެއްގެ އަތުން ހިފަހައްޓާފައިވާ ބަނގުރާ ފުޅިއެއް ކަމަށެވެ.
އަދި ބަނގުރާ ނައްތައިލާފައިވަނީ ފުލުހުންގެ ބެލުމުގެދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުން ކަމަށްވެސް ފުލުހުން ބުންޏެވެ.
