ޕާކިސްތާނަށް ކުރަމުންދާ ވިއްސާރައިގައި 33 މިލިޔަން މީހުން ހާލުގައި ޖެހި ނުވަސަތޭކައަށްވުރެ ގިނަ މީހުން މަރުވުމާއި ގުޅިގެން ދުނިޔޭގެ އެހީ ތެރިކަމަށް އެގައުމުގެ ބޮޑުވަޒީރު ޝެހްބާޒް ޝަރީފް އެދިވަޑައިގެންފިއެވެ.
ޝަރީފް ދުނިޔޭގެ ގައުމުތަކުގެ އެހީތެރިކަމަށް އެދިވަޑައިގަތީ އެގައުމުގައި ތިއްބަވާ އެކިއެކި ގައުމުތަކުގެ ޑިޕްލޮމޭޓުންނާ ބައްދަލު ކުރެއްވުމަށްފަހު ކުރެއްވި ޓްވީޓެއްގައެވެ.
"ދުނިޔޭގެ ގައުމުތަކުން މިދަނޑިވަޅުގައި ފޮނުވަމުންދާ ހަމްދަރުދީގެ މެސެޖްތަކަށް އަހަރެމެން ޝުކުރު އަދާކުރަން. ދުނިޔޭގެ އެހީތެރިކަމާއެކު އަލުން އާރާސްތު ކުރުމަށް އިތުރަށް ފަސޭހަ ވެގެންދާނެ" ގައުމުތަކުގެ އެހީތެރިކަން ބޭނުންފުޅުވާކަން ހާމަ ކުރައްވައި ކުރެއްވި ޓްވީޓުގައި ޝަރީފް ވިދާޅުވިއެވެ.
ފެންބޮޑުވުމުގެ ކާރިސާގައި އެންމެ ބޮޑަށް ގެއްލުން ލިބެމުން ދަނީ ބަލޮޖިސްތާން ޕްރިވިންސަށާއި ސިންދް ޕްރޮވިންސަށެވެ. މިސަރަހައްދުތަކުގައި ދިރިއުޅޭ ގިނަ އަދަދެއްގެ ބަޔަކު މިހާރުވެސް ވަނީ ރައްކާތެރި ހިސާބުތަކަށް ގެންގޮސްފައެވެ.
ފެންބޮޑުވުމުގެ ކާރިސާއާ ކުރިމަތިލުމަށް އދ.އިން ވަނީ 3 މިލިޔަން ޑޮލަރު ޕާކިސްތާނަށް ފޯރު ކޮށްދީފައެވެ. މިފައިސާ ހަރަދު ކުރުމަށް ހަމަޖެހިފައި ވަނީ މިކާރިސާގައި އެންމެ ބޮޑަށް ގެއްލުން ލިބުނު ސަރަހައްދުތަކަށް ސާފު ބޯފެނާއި ކާނާ އަދި ބޯހިޔާވަހިކަން ފޯރުކޮށްދިނުމަށެވެ.
