އަފްޣާނިސްތާންގެ ފެން ފަށަލަ ދަށްވުމުގެ ސަބަބުން އެގައުމުގެ ބައެއް ސަރަހައްދުތަކަށް ބޯފެން ދަތިވާން ފަށައިފިއެވެ.
ބަގްރާމް ޑިސްޓްރިކްޓްގެ ބަލާ ކޯހުގެ ރައްޔިތުން ބުނާ ގޮތުގައި އެ ސަރަހައްދުގައި ފެން ހޯދަން ދުރަށް ހިނގާފައި ދާން ޖެހެއެވެ. ތުލޫޢު ވިއުސްއިން ބުނިގޮތުގައި އެގޮތަށް އެހިސާބު މީހުން ފެން އުފުލާތާ މިހާރު ތިން އަހަރު ވެއްޖެއެވެ. އަދި ބައެއް ދުވަސް ދުވަހު އެތަންތާނގައި ފެން ވަރަށް ބޮޑަށް މަދުވެފައި ހުރެއެވެ.
އެ ސަހަރުގެ މުސްކުޅިން ބުނަނީ ގިނަ މީހުން ފެން ނުލިބުމުން ސަރަހައްދު ދޫކޮށް ބޭރުވެގެންދާ ކަމަށެވެ.
އެ ސަރަހައްދުގައި 500 އާއިލާ ދިރިއުޅެމުންދާއިރު އިގްތިސާދީ ގޮންޖެހުންތަކުގެ ސަބަބުން އެމީޙުންނަށް އެހެން ތާކަށް ބަދަލު ވެވޭނެ ގޮތެއްވެސް ނެތެވެ.
އަފްޣާނިސްތާންގެ ފެނާ ބެހޭ ތަޖުރިބާކާރުން ބުނެފައި ވަނީ މިދިޔަ އަހަރާ އަޅާބަލާއިރު މިއަހަރު އެގައުމުގެ ފެން ފަށަލަ ހިނދިފައިވާ ކަމަށެވެ.
ކާބުލްގައިވެސް މާގިނައިން ފެން ބޭނުންކުރުމުގެ ސަބަބުން މިއަހަރު ބިމުގެ އަޑީގެ ފެނުގެ މިންވަރު ވަނީ 50 ޕަސެންޓަށް ދަށަށް ގޮސްފައެވެ.
