ޕާކިސްތާނުން އެމެރިކާގެ ޑްރޯންތަކަށް އެގައުމުގެ ވައިގެ ސަރަހައްދު ބޭނުންކޮށްގެން އަފްޣާނިސްތާނަށް ވަނުމުގެ ހުއްދަ ދީފައިވާ ކަމަށް ތާލިބާނުންގެ ވަގުތީ ޑިފެންސް މިނިސްޓަރު ވިދާޅުވެފައިވާ ވާހަކަތައް ޕާކިސްތާނުން ދޮގު ކޮށްފިއެވެ.
ކާބުލްގައި ބޭއްވި ނޫސްވެރިންގެ ބައްދަލުވުމުގައި ވަގުތީ މިނިސްޓަރ އޮފް ޑިފެންސް މުލާ މުހައްމަދު ޔަޤޫބު ވިދާޅުވީ އެމެރިކާގެ ޑްރޯންތައް ޕާކިސްތާން މެދުވެރިކޮށް އަފްޣާނިސްތާނަށް އެތެރެވަމުން އަންނަ ކަމަށެވެ. މުއްލާ ޔައުޤޫބަކީ މަރުޙޫމް މުއްލާ އުމަރުގެ ދަރިފުޅެކެވެ.
"އަޅުގަނޑުމެންގެ މައުލޫމާތަށް ބަލާއިރު ޑްރޯންތައް ޕާކިސްތާން މެދުވެރިކޮށް އަފްޣާނިސްތާނަށް ވަންނަނީ، އެމީހުން ބޭނުންކުރަނީ ޕާކިސްތާނުގެ ވައިގެ ސަރަހައްދު، އަޅުގަނޑުމެން ޕާކިސްތާންގައި އެދެން، އަޅުގަނޑުމެންނާ ދެކޮޅަށް ތިޔަބޭފުޅުންގެ ވައިގެ ސަރަހައްދު ބޭނުން ކުރިޔަ ނުދިނުމަށް" ނޫސްވރިންގެ ބައްދަލުވުމުގައި އޭނާ ވިދާޅުވި އެވެ.
ޖުލައި މަހު ކާބުލްގައި އެމެރިކާއިން ދިން ޑްރޯން ހަމަލާގައި އަލްޤައިދާގެ ލީޑަރު އައިމަން އަލް ޒަވާހިރީ މަރާލި ހަމަލާގައި ބައިވެރިވި ކަމަށް ނުވަތަ އެކަމުގެ މައުލޫމާތު ކުރިން ލިބިފައިވާ ކަމަށް ބުނާ ވާހަކަތައް ޕާކިސްތާނުގެ ކަމާބެހޭ ފަރާތްތަކުން ވަނީ ދޮގުކޮށްފަ އެވެ. އެހެން ނަމަވެސް މުއްލާ ޔަޢުޤޫބުގެ ވާހަކަތަކަށް ޕާކިސްތާނުގެ ޚާރިޖީ ވުޒާރާއިން ވަގުތުން ޖަވާބެއް ނުދެ އެވެ.
ޕާކިސްތާނާ ދެކޮޅަށް ހަނގުރާމަ ކުރާ ޕާކިސްތާނުގެ ތާލިބާން ހަނގުރާމަވެރި ޖަމާއަތާ އެކު އަފްޣާނިސްތާނުގެ ތާލިބާނުން މެދުވެރިކޮށް ބާއްވާ ސުލްހައިގެ މަޝްވަރާތައް މެދުވެރިކުރަމުންދާ މިދަނޑިވަޅުގައި ޔަޤޫބްގެ މި ވާހަކަފުޅުތަކުގެ ސަބަބުން ޕަކިސްތާނާއެކު އޮތް ގުޅުން ފިތުނަވެރި ވެދާނެ ކަމަށް ލަފާ ކުރެވެއެވެ. ދެ ގައުމަކީ އެއް ގައުމުން އަނއް ގައުމަށް ބަރޯސާވާ ދެގައުމެވެ. އަދި އަފްޣާނިސްތާނުގައި ވެސް އިގްތިސާދީ ދަތިތަކެއް ކުރިމަތިވެފައިވާތީ ޕާކިސްތާނާ އެކު ވިޔަފާރި ކުރުމަށް ކާބުލްއިން ވަރަށް ބޮޑަށް ބަރޯސާވެއެވެ. އަފްޣާން ކޯލާ ދެއްޔަށް ޕާކިސްތާނުން ބަރޯސާވެއެވެ.
ތާލިބާނުން ބުނީ ޖުލައި މަހު ދިން ވައިގެ ހަމަލާ ތަހުގީގު ކުރަމުންދާ ކަމަށާއި، އަދި މިހާތަނަށް އަލްޤައިދާގެ ލީޑަރުގެ ހަށިގަނޑު ފެނިފައިނުވާ ކަމަށެވެ.
