ޕާކިސްތާނުގައި ފެންބޮޑުވުމުގެ ސަބަބުން މުދާ ސަޕްލައި ކުރުމަށް ބުރޫ އަރާފައި ވުމުގެ ސަބަބުން ޕެޓްރޯލިއަމް އުފެއްދުންތަކުގެ އަގުތައް ވަނީ އިތުރަށް ބޮޑު ވެގެން ގޮސްފައެވެ. ސެންސިޓިވް ޕްރައިސް އިންޑިކޭޓަރު ދައްކާ ގޮތުން އާންމު މުދަލުގެ އަގުތައް 44.58 ޕަސެންޓަށް މައްޗަށް ގޮސްފައިވާ ކަމަށް ރިޕޯޓް ކޮށްފައިވާ އިރު މިއީ ޕާކިސްތާންގައި އާދަޔާޚިލާފް މިންވަރެއްގެ އިންފްލޭޝަނެކެވެ.
ސްޓޭޓް ބޭންކް އޮފް ޕާކިސްތާނުން ބުނާ ގޮތުގައި ސެންސިޓިވް ޕްރައިސް އިންޑިކޭޓަރ (އެސްޕީއައި) ފަރުމާކޮށްފައިވަނީ ކޮންމެހެން ބޭނުންވާ ކޮންސިއުމަރ ތަކެތީގެ އަގު ދަތުރުކުރާ މިންވަރު ކުރު މުއްދަތެއްގެ ތެރޭގައި، ހަފްތާއަކު އެއްފަހަރު ވަޒަންކުރުމަށް، އިސްލާހީ ފިޔަވަޅުތައް އެޅުމަށެވެ.
ސެންސިޓިވް ޕްރައިސް އިންޑެކްސް އިން ހުރިހާ ރެކޯޑެއް މުގުރާލާފައިވާކަމަށް ދައްކާ ކަމަށް އެސްބީޕީން ބުނެއެވެ.
ޕާކިސްތާނުގެ މީޑިއާ، ދަ ނޭޝަން އިން ބުނާ ގޮތުގައި ޖުމްލަ 51 ބާވަތެއްގެ މުދަލުގެ ތެރެއިން މިދިޔަ ހަފްތާގައި 23 ބާވަތުގެ އަގު ބޮޑުވިއިރު އަގު ދަށްވެފައި ވަނީ އެންމެ ހަތް ވބާވަތެއްގެ އެވެ.
އޭގެ އިތުރުން ޕާކިސްތާން ބިއުރޯ އޮފް ސްޓެޓިސްޓިކްސް އިން ހުކުރު ދުވަހު ނެރުނު ރިޕޯޓެއްގައިވާ ގޮތުން 23 ޒަރޫރީ ބާވަތެއްގެ އަގު ވަނީ އާދަޔާ ޚިލާފަށް މައްޗަށް ގޮސްފަ އެވެ.
އަގުބޮޑުވެފައިވާ ތަކެތީގެ ތެރޭގައި ޓޮމާޓޯގެ އަގު 43.09 ރުފިޔާ، ފިޔާގެ އަގު 41.13 ރުފިޔާ، އާފަލުގެ އަގު 6.32 ޕަސެންޓް، ބިސް 3.43 ޕަސެންޓް، އަލުވި 2.23 ޕަސެންޓް، ހިކި ކިރު 1.53 ޕަސެންޓް، މުގު 1.12 ޕަސެންޓް، ސިނގިރޭޓް 2.26 ޕަސެންޓް އަދި ކައްކާ ގޭސް 1.95 ޕަސެންޓަށް ބޮޑު ވެފައި ވެއެވެ.
އަގު ދަށްވި ތަކެތީގެ ތެރޭގައި މަސޫރު ޑާލް 1.18 ޕަސެންޓަށް، ވެޖެޓަބަލް ގީ 1 ޕަސެންޓަށް އަދި ކުކިންގ އޮއިލް 0.51 ޕަސެންޓަށް އަދި ހަކުރު 0.07 ޕަސެންޓަށް އަދި ރެވިތެޔޮ 0.07 ޕަސެންޓަށް އަގު ހެޔޮ ވެފައި ވެއެވެ.
ޕާކިސްތާންގައި ފެން ބޮޑުވުމުގެ ސަބަބުން ގެތަކާއި މަގުތަކާއި ފާލަންތައް ދޮވެވިފައިވާތީ އެގައުމު ވަނީ ބޮޑު ކާރިސާއަކާ ކުރިމަތިލައިފައެވެ. އަދި އެތައް މިލިއަން މީހުން ވަނީ ހާލުގައި ޖެހިފައެވެ.
