ހުޅަނގުގެ ގައުމުތަކުން ދަނީ އެމީހުން އަމިއްލައަށް އަޅާފައިވާ ދަތިކުރުމުގެ ފިޔަވަޅުތަކުން ސަލާމަތްވެ ރަޝިޔާއިން ފައިދާ ނަގަމުންނެވެ. ނިއުދިއްލީގައި ހުންނަވާ ރަޝިޔާގެ ސަފީރު ޑެނިސް އަލީޕޯވް ވިދާޅުވަނީ ހުޅަނގުގެ "އަމިއްލަ ނާޖާއިޒު ދަތިކުރުމުގެ ފިޔަވަޅުތަކުން" އިސްތިސްނާވަމުންދާއިރު ރަޝިޔާގެ ސާފުނުކުރާ ތެޔޮ އިންޑިއާއިން އެތެރެ ކުރުމުން އެކަމާ މެދު ހުޅަނގުގެ ގައުމުތަކުން ފާޑުކިޔުމަކީ ދެފުށްހެކެރި މިންގަނޑެއް ހުޅަނގުން ގެންގުޅުން ކަމަށެވެ.
ޕްރެސްޓްރަސްޓް އޮފް އިންޑިއާއާ ވާހަކަ ދައްކަވަމުން ރަޝިޔާގެ މަންދޫބު ވިދާޅުވީ އިންޑިއާ އާއި ރަޝިޔާއާ ދެމެދު ވިޔަފާރި ކުރިއަރަމުންދާ ކަމަށާއި ދެފަރާތުން ވެސް ވިޔަފާރި މުއާމަލާތަށް ފައިސާދެއްކުމަށް ޕޭމަންޓް ސިސްޓަމްތަކެއް ގާއިމްކޮށްފައިވާ ކަމަށެވެ. އަދި އޭޝިއާގައި ވަކި ވިޔަފާރި ހިއްސާދާރުން ތިބުމުން ތިންވަނަ ގައުމެއްގެ ފައިސާ ބޭނުންކުރުމުގެ އިޚްތިޔާރު ވެސް ލިބިފައި އޮތް ކަމަށާއި މެދުއިރުމަތީގައިވެސް ފުރުސަތުތަކެއް އޮތް ކަމަށެވެ.
މާޒީގައި ރަޝިޔާއަކީ އިންޑިއާއަށް ތެޔޮ އެކްސްޕޯޓްކޮށް ތެލުގެ ވިޔަފާރީގެ ބޮޑު މަސްދަރަކަށް ނުވި ނަމަވެސް އަގު ހެޔޮކޮށް ލިބޭ ރަޝިޔާގެ ސާފުނުކުރާ ތެޔޮ އިމްޕޯޓް ކުރުން މިދިޔަ މަސްތަކުގައި ވަރަށް ބޮޑަށް އިންޑިއާގައި އިތުރުވެފައިވެއެވެ.
ހުޅަނގުގެ ގައުމުތަކުން ވަނީ ދަތިކުރުމުގެ ފިޔަވަޅާއެކުވެސް ރަޝިޔާއިން ގޭސް އެތެރެ ކޮށްފައެވެ. އަލީޕޯވް ވިދާޅުވިގޮތުގައި އެގޮތަށް ކަންކޮށްފައި އިންޑިއާއަށް އެގައުމުތަކުން ފާޑު ކިޔުމަކީ ދެފުށް ދެގޮތް ހަމައެއް ކަމަށެވެ.
ކަނޑު އުޅަނދުފަހަރުގެ ޓްރެކިންގ ޑޭޓާ ދައްކާ ގޮތުން ގްރީސްފަދަ ގައުމުތަކުގެ އުލަނދުތަކުން ދަތިކުރުގެފިޔަފަޅާއެކުވެސް ރަޝިޔާގެ ބަނދަރުތަކަށް ދަުރުކޮށް ބަރާކޮށްފައިވާ އަދަދު އިތުރު ކަމަށް ދައްކައެވެ.
