ޕާކިސްތާނުގައި މޫސުން ގޯސްވުމުގެ ސަބަބުން މަރުވި މީހުންގެ އަދަދު 1000 އަށް ވުރެ މައްޗަށް އަރާފައިވެއެވެ. ގަތަރާއި އީރާނާ އެކު ބައެއް ގައުމުތަކުން ވަނީ ޕާކިސްތާނަށް އެހީ ފޯރުވައިދޭން ފަށާފައެވެ. މިދިޔަ 24 ގަޑިއިރުގެ ތެރޭގައި ޕާކިސްތާންގެ ފެން ބޮޑުވުމުގައި 119 މީހަކު މަރުވެފައި ވެއެވެ. އަދި ޖޫން މަހުން ފެށިގެން މިހާތަނަށް 1،033 މަރުވެފައިވާނެ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެއެވެ.
އެގޮތުން އިންޑަސް ކޯރުތަކުގެ ކައިރީގައިވާ ބައެއް ސަރަހައްދުތަކުގައި ޚާއްސަކޮށް ޚައިބަރު ޕަޚްތުންޚްވާ ޕްރޮވިންސްގެ ނޯޝެރާ އާއި ޕަންޖާބު ޕްރޮވިންސްގެ ކާލާބާގް އަދި ޗަޝްމާގައި އިތުރަށް ފެންބޮޑުވާނެ ކަމުގެ އިންޒާރު ދީފައިވެ އެވެ.
ޕާކިސްތާނުން ގައުމީ ކުއްލި ނުރައްކަލުގެ ހާލަތު އިއުލާން ކުރަނީ ފެން ބޮޑު ވުމުގެ ސަބަބުން މަރުވި މީހުންގެ އަދަދު 1000 އާ ގާތްވުމުންނެވެ.
ޕާކިސްތާނުގައި ފެން ބޮޑުވުމުގެ ސަބަބުން 30 މިލިއަނަށް ވުރެ ގިނަ މީހުން ހާލުގައި ޖެހިފައިވާ ކަމަށް ޕާކިސްތާންގެ ސެނެޓަރ ޝެރީ ރަޙުމާން ވިދާޅުވިއެވެ. އަދި މުޅި ޕާކިސްތާނަށް ރެކޯޑް އަދަދަކަށް މޫސުން ގޯސްވެފައި ވެއެވެ.
ޕާކިސްތާންގެ ބޮޑެތި ހިސާބުތައް އަދިވެސް ވަނީ ފެނުއަޑީގައެވެ. އޭގެ ތެރޭގައި ޚާއްސަކޮށް ދެކުނުގެ ބަލޫޗިސްތާން، ކޭޕީ އަދި ސިންދު ސަރަހައްދުތަކަށް ބޯކޮށް ވާރޭވެހެމުން ދެއެވެ.
މޮންސޫންއަކީ އިންޑިއާ ބައްރުގެ އެކި ހިސާބުތަކުގައި ދަނޑުވެރިކަމުގެ ބާވަތްތައް ފެން ދިނުމާއި ލޭކްތަކާއި ޑޭމްތައް ފުރިހަމަ ކުރުމަށް ކޮންމެހެން ބޭނުންތެރި މޫސުމެކެވެ. ނަމަވެސް ކޮންމެ އަހަރަކު ވެސް އެ މޫސުމުގައި ފެން ބޮޑުވެ ބޮޑެތި ގެއްލުންތައް ލިބެއެވެ.
މިއަހަރުވެސް ބައެއް ސަރަހައްދުތަކަށް ވާރޭވެހިފައިވަނީ އެވްރެޖް ކޮށް 600 އިންސައްތަ އިތުރުކޮށެވެ.
ޕާކިސްތާނުގެ ސެނެޓަރ ޝެރީ ރެހްމާން ވިދާޅުވާ ގޮތުގައި ޕާކިސްތާނަށް ކުރިމަތިވަމުން އަންނަނީ ސީރިއަސް މޫސުމީ ކާރިސާއެކެވެ. މިއީ
މި ދިހަ އަހަރު ތެރޭގައި ދިމާވި އެންމެ އުނދަގޫ އެއް ކާރިސާ ކަމަށް އޭނާ ސިފަ ކުރައްވައެވެ.
އޮފިޝަލުން ބުނާ ގޮތުގައި މިއަހަރުގެ ކާރިސާގެ ސަބަބުން ދަނޑުވެރިކަމުގެ ބާވަތްތަކާއި ދިރޭތަކެތި ގެއްލި، ގާތްގަނޑަކަށް މިލިއަނެއްހާ ގެދޮރު ހަލާކުވެފައިވެއެވެ.
އެންޑީއެމްއޭއިން ބުނީ ދަނޑުވެރިކަމުގެ ބާވަތްތައް އިންދާފައިވާ 809،000 ހެކްޓަރަށް ވުރެ ބޮޑު ސަރަހައްދެއް ދޮވެވިގެން ގޮސްފައިވާ ކަމަށެވެ. އަދި 3،451 ކިލޯމީޓަރު (2،150 މޭލު) މަގުތައް ހަލާކުވެ، 149 ބްރިޖެއްވެސް ވެށްޓިފައިވާ ކަމަށެވެ.
