އެމެރިކާގެ ކަނޑުގެ ސިފައިންގެ ދެ ހަނގުރާމަ މަނަވަރު ޓައިވާން ސްޓްރެއިޓްއަށް ވަދެއްޖެ އެވެ. ޖަޕާނުގައި ހުންނަ އެމެރިކާގެ ހަތް ވަނަ ފްލީޓުން ނެރުނު ބަޔާނެއްގައި ބުނެފައި ވަނީ ގައިޑެޑް މިސައިލް ކްރޫޒާ ޔޫއެސްއެސް އެންޓިއެޓަމް އާއި ޔޫއެސްއެސް ޗާންސެލަރޒްވިލް ދަތުރު ކުރަމުން ދިޔައީ "ބައިނަލްއަގްވާމީ ގާނޫނުތަކާ އެއްގޮތަށް ކަނޑުމަތީގައި ދަތުރުކުރުމާއި އުދުހުމުގެ މިނިވަންކަން ތަންފީޒުކުރެވޭ ފަދަ ކަނޑުތަކުގެ ސަރަހައްދުގެ ތެރެއިން" ކަމަށެވެ.
އެގޮތުން މިނިވަންކަމާއެކު ދަތުރު ކުރެވޭ ކަމަށާއި އަދި މިހާތަނަށް އަސްކަރީ ބާރެއްގެ އެއްވެސް ބެހުމެއް ނެތް ކަމަށް ބުނެފައިވެ އެވެ.
އެމެރިކާއިން ބުނީ ޓައިވާން ސްޓްރެއިޓްގެ ތެރެއިން ބޯޓުތައް ދަތުރުކުރުމުން ދައްކުވައިދެނީ މިނިވަން އަދި ހުޅުވާލެވިފައިވާ އިންޑޯ ޕެސިފިކް އަކަށް އެމެރިކާއިން ވައުދުވެފައިވާކަން އެގޮތުގައި ދަމަހައްޓާ ކަމެވެ. އަދި ބައިނަލްއަގްވާމީ ގާނޫނު ހުއްދަކުރާ ކޮންމެ ތަނެއްގައި ވެސް އެމެރިކާގެ ސިފައިންގެ ބޯޓުތަކުން އޮޕަރޭޓް ކުރާނެ ކަމަށެވެ.
އެމެރިކާގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު ޖޯން ކަރބީވެސް ވަނީ ބައިނަލްއަގްވާމީ ގާނޫނުން ހުއްދަކުރާ ކޮންމެ ތަނެއްގައި އެމެރިކާގެ ސިފައިން އޮޕަރޭޓް ކުރާނެ ކަމަށް ބުނެފައެވެ.
ޗައިނާގެ ސިފައިންގެ އީސްޓަން ތިއޭޓަރ ކޮމާންޑުން ބުނީ އެ ދެ ބޯޓުގެ ރާސްތާ މޮނިޓާ ކުރަމުންދާ ކަމަށާއި، އަދި ޗައިނާ ސިފައިން ހައި އެލާޓްގައި ތިބި ކަމަށާއި އެއްވެސް ރުޅިއަރުވާލުމެއް ނާކާމިޔާބު ކުރުމަށް ތައްޔާރަށް އޮތް ކަމަށެވެ.
