ޒާންގް މެންގް އަށް މިދިޔަ ޑިސެމްބަރު މަހު ވަނީ ނަފްސާނީ ގޮތުން މީހާ އެއްކޮށް ބަލިކޮށްލާފައެވެ. ބެއިޖިންގައި ހުންނަ އޭނާ ކިޔަވާ ޔުނިވާސިޓީ ކެމްޕަސްގައި ކޮވިޑް-19 އަށްޓަކައި ތަކުރާރުކޮށް ފުރަބަންދު އެޅުވުމުން އެކަމާ މާޔޫސް ވެގެން އުމުރުން 20 އަހަރުގެ މި ދަރިވަރަށް ސިޑިމަތީގައި އިށީދެލައިގެން އިންދައި ގިސްލާރޮވުނެވެ.
ފުރަބަންދުތައް ތަކުރާރުކޮށް އިއުލާން ކުރުމުގެ ސަބަބުން އެނާއާ އެހެން ދަރިވަރުން ގިނައިން އުޅެނީ ކޮޓަރީގައި އެކަހެރިކޮށެވެ. ރައްޓެހިންނާ ބައްދަލު ކުރެވޭނެ ގޮތެއް ނޯވެއެވެ. އަދި ކެންޓީނަށް އެއްޗެއް ކާލަން ދާންވާ ވަގުތާއި ފެންވަރާން ހައްމާމަށް ދާން އޮންނަ ވަގުތުވެސް އޮންނަނީ މިކަން ހަރުކަށި ކޮށް ކަނޑައަޅާފައެވެ.
އެހެން މީހުންނާ ގުޅިގެން އުޅެން އާދަވެފައިވާ ރަޙުމަތްތެރި މިޒާޖުގެ ޒާންގް ބުނަނީ ކޯވިޑާ ގުޅިގެން އަޅާފައި ހުރިހުރަސްތަކުގެ ސަބަބުން މުޅި ދިރިއުޅުން އެފުށް މިފުށަށް ޖަހާލާފައިވާ ކަމަށެވެ. ނުތަނަވަސްކަމާ ހެދި، އޭނާ ޑޮކްޓަރަށް ދެއްކުމުން ޑައެގްނޯޒް ކުރީ އޭނާއަށް ޑިޕްރެޝަން އާއި އެންޒައިޓީ ޖެހިފައިވާކަމަށެވެ.
ފުރަތަމަ ނަން ބޭނުން ނުކުރުމަށް އެދުނު، އުމުރުން 20 އަހަރުގެ ޔާއޯއަށް ވެސް އޭނާގެ ފުރަތަމަ ބްރޭކްޑައުންއާއި ލައިގަތީ ބޯޑިންގ ހައުސްގައި ދިރިއުޅެމުން ދަނިކޮށް ފުރަބަންދާ ހެއްޖެވެ. އޭނާގެ އަބަދުވެސް ސުއާލަކީ ފުރަބަންދުގެ ސިޔާސަތުތައް އެހައި ހަރުކަށި ވާން ޖެހޭ ހެއްޔެވެ؟
ޔާއޯވެސް ކިޔައިދިން ގޮތުގައި އެކަނިވެރިކަމާއި ހެދި ފާޚާނާތެރޭގައި އަބަދު ހަރު އަޑުން ރޮއެ ހެދުން އޮންނަނީ އާންމު ކަމަކަށް ވެފައެވެ.
2021 ވަނަ އަހަރުގެ ކުރީކޮޅު ބެއިޖިންގެ ޔުނިވާސިޓީގައި ހުއްޓާ ޑިޕްރެޝަން ޖެހިގެން އޭނާއަށް ކިޔެވުމުގައި އުދަގޫތަކެއް ވިއެވެ. އޭނާ ބޭނުންވި އަމިއްލައަށް މަރުވެގަންނާށެވެ. ނަމަވެސް އޭނާގެ ބައްޕަ ހަނދާން ވުމުން އޭނާ އެޚިޔާލުން ދުރުހެލިވީއެވެ.
ޗައިނާއިން ވަނީ ކޮވިޑް-19 ފެތުރޭ ކޮންމެ ދިމާލެއްގައި ބަލި ނައްތާލުމަށްޓަކައި ހަރުކަށި ފުރަބަންދެއް ރައްޔިތުންނަށް މަޖުބޫރުކޮށްފައެވެ. ބައެއް ތަންތާނގައި ތަކުރާރު ކޮށް އެކި ދިހަމަތިން އަވަސްއަވަހަށް ފުރަބަންދު ބޯޑުއަޅުވާފައި ވެއެވެ.
ޗައިނާގެ ހަރުކަށި ފުރަބަންދާ ގުޅޭ އެކިއެކި ކަންކަމުގައި މިއަދާ ހަމައަށް 5،200 އެއްހާ މީހުން މަރުވި ކަމަށްވެއެވެ.
ޗައިނާގައި ފުރަބަންދުގެ ސަބަބުން ޒުވާނުންގެ ނަފްސާނީ ސިއްހަތަށް ބޮޑު އަސަރުތަކެއް ކޮށްފައި ވެއެވެ. ޑޮކްތަރުން ބުނާ ގޮތުގައި ޒާންގް އާއި ޔާއޯގެ ތަޖުރިބާއަކީ ހަމައެކަނި ސާމްޕަލް ހާލަތްތަކެވެ. ހަގީގަތުގައި އަސަރު އެއަށް ވުރެން ފުން ވެފައި ފުޅާވާނެއެވެ.
"ޗައިނާގެ ލޮކްޑައުންތަކުގެ ސަބަބުން ނަފްސާނީ ބަލިތަކުގެ ހިޔަނި ޗައިނާގެ ސަގާފަތާއި އިގްތިސާދަށް ކުރިއަށް އޮތް އަހަރުތަކުގައި ކުރަމުންދާނެ" އިނގިރޭސި މެޑިކަލް ޖާނަލް ދަ ލަންސެޓްގެ ޖޫން މަހުގެ އެޑިޓޯރިއަލްގައި ބުނެފައިވެއެވެ.
ޗައިނާގައި މިހާރުގެ ޖީލަށް ދިމާވާ ނަފްސާނީ ބަލިމަޑުކަން މާޑުވާނެއެވެ. މިހާރުގެ ޒުވާނުންނަކީ އެމީހުންގެ ދިރިއުޅުމުގެ ކަންކަމަށް ކޮންޓްރޯލު އޮތް ބައެއް ނޫނެވެ. ތައިލީމާއި ވަޒީފާގެ ފުރުސަތުގެ ހަނިކަމާ ހެދި މިމީހުންގެ ނަފްސާނީ މައްސަލަތައް އިތުރު ވެގެން ދެއެވެ.
ކޮވިޑް-19 އަށް ކަނޑައެޅިފައިވާ ހުރަސްތަކުގެ ސަބަބުން ޗައިނާގެ ގާތްގަނޑަކަށް 220 މިލިއަން ކުދިންނާއި ޒުވާނުން ދިގު މުއްދަތަކަށް ބަންދުގައި ތިބި ކަމަށް އެޑިއުކޭޝަން މިނިސްޓްރީން 2020 ވަނަ އަހަރު އަންދާޒާކުރިއެވެ.
