ސޮލަމަން އައިލެންޑްސްއާއި އެމެރިކާއާ ދެމެދު ނުތަނަވަސްކަމެއް އުފެދިއްޖެއެވެ. އެމެރިކާގެ ކޯސްޓްގާޑު އުޅަނދަކުން ސޮލަމަން އައިލެންޑަށް ޒިޔާރަތް ކުރަން އެދި ހުއްދައަށް އެދުމުން ސޮލަމަންއިން ޖަވާބެއް ދީފައެއް ނުވެއެވެ. އަދި އެއަށްފަހު އެއުޅަނދު ވަނީ ޕަޕުއާ ނިއުގިނީއަށް ގޮސްފައެވެ.
އޮސްޓްރޭލިއާގެ ކެންބަރާގައި ހުންނަ އެމެރިކާ އެމްބަސީގެ ތަރުޖަމާނު ވިދާޅުވި ގޮތުގައި ކަން ދިމާވި ގޮތާ މެދު މަސްއޫލުވެރިން ގެންދަނީ "ހާލަތު މޮނިޓަރ ކުރަމުން" ކަމަށެވެ.
އެމެރިކާގެ ކޯސްޓްގާޑްގެ އުލަނދު ސޮލަމަންއަށް ވަންނަން އުޅުނީ އޮގަސްޓް 23 ވަނަ ދުވަހުއެވެ. އެމެރިކާގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު ޖޯން ކަރބީ ވިދާޅުވީ ކޯސްޓްގާރޑް އުޅަނދުގެ ދަތުރަކީ އާދައިގެ މަތިން ކުރާ ދަތުރެއް ކަމަށެވެ. އަދި ސޮލަމަން ސަރުކާރުގެ "މި ނިންމުމާ މެދު މާޔޫސްވި" ކަމަށާއި ނަމަވެސް ކުރިއަށް އޮތްތަނުގައި އެމެރިކާގެ ބޯޓުތަކަށް އެގައުމަށް ވަނުމަށް ހުއްދަ ލިބޭނެ ކަމަށް ލަފާކުރާކަމަށެވެ.
ސޮލޮމަން އައިލެންޑްސްގެ ބޮޑުވަޒީރު މަނަސޭ ސޮގަވަރޭ ނެރުއްވި ބަޔާނެއްގައި ވިދާޅުވީީ އެމެރިކާގެ ކޯސްޓްގާޑްގެ އުޅަނދު ބަނދަރު ކުރުމުގެ ހުއްދަ އޭނާގެ ގައުމުން ދިން ކަމަށާއި ނަމަވެސް ބޯޓަށް އެ ވާހަކަ އެންގިއިރު އެ ބޯޓު އޮތީ ފުރައިގެން ގޮސްފައި ކަމަށެވެ.
ސޮގަވަރޭ ވިދާޅުވީ އޭނާގެ ސަރުކާރުން ވަނީ "ހުރިހާ އެކުވެރި ގައުމުތަކަށް" ކަނޑު އުޅަނދުތަކުގެ ޒިޔާރަތްކުރުން މިދުވަސްވަރަށް މަޑުޖައްސާލަން ނިންމާފައިވާ ކަން އަންގާފައެވެ. އަދި ޑިޕްލޮމެޓިކް ހުއްދަ ދިނުމުގައި ގެންގުޅޭ އުސޫލުތައް އަލުން މުރާޖައާ ކުރުމަށްފަހު ހުއްދަ ދޭން ފަށާނެ ކަމަށެވެ.
ސޮލަމަންއައިން ވަނީ ޗައިނާ ސަރުކާރާއެކު އަސްކަރީ އެއްބަސްވުމެއް ހަދައިފައެވެ. އަދި އެއީ މި ސަރަހައްދުގައި ހެދުނު މިފަދަ ފުރަތަމަ އެއްބަސްވުމެވެ. އަދި މި މައްސަލައަކީ ޗައިނާއަށް ލިބުނު ބޮޑު ޑިޕްލޮމެޓިކް ކާމިޔާބެކެވެ.
ޗައިނާ ބޯޓުތައް ސޮލަމަން އައިލެންޑްސްގައި ބަނދަރު ކުރާނަމަ އެއީ އޮސްޓްރޭލިއާގެ އައްސޭރިފަށާ އެންމެ 2،000 ކިލޯމީޓަރު (1،200 މޭލު) ދުރުގައި ޗައިނާގެ ހަނގުރާމަ މަތީ މަނަވަރުތަކަށް ބަނދަރު ކުރުމަށް ލިބޭ ފުރުސަތެކެވެ!
ސޮލަމަންގެ ވިސްނުން މުޅިން ސާފެއް ނޫނެވެ. ނަމަވެސް ސޮލޮމަން އައިލެންޑްސް ސަރުކާރުން ވަނީ އެގައުމުގެ ސަރަހައްދުގައި ޗައިނާގެ އަސްކަރީ މަރުކަޒެއް ހެދުމުގެ ހުއްދަ ދިނުމުގެ ވިސްނުމެއް ނެތް ކަމަށް ބުނެފަ އެވެ.
