ދުނިޔޭގެ މޫސުމާ ބެހޭ ހާލަތުގެ ރިޕޯޓް ސްޓޭޓް އޮފް ދަ ކްލައިމެޓް ގައިވާ ގޮތުން ކަނޑުގެ ލޮނުގަނޑުގެ ހޫނުގެ މިންވަރާއި ގްރީންހައުސް ގޭހުގެ މިންވަރު 2021 ވަނަ އަހަރު ކުރިން ފާހަގަވެފައި ނުވާ މިންވަރަކަށް މަތިވެފައިވާ ކަމަށް ދައްކައެވެ.
މޫސުމަށް އަންނަ ބަދަލުތަކުގެ ސަބަބުން ދުނިޔެއަށް އަންމުންދާ ބަދަލުތަކުގެ ސައިންޓިފިކް ހެކިތައް އަހަރީ ރިޕޯޓުގައި ދައްކާފައިވާކަމަށް މި ދިރާސާގައި އިސްކޮށް ހަރަކާތްތެރިވި ނޭޝަނަލް އޯޝަނިކް އެންޑް އެޓްމޮސްފެރިކް އެޑްމިނިސްޓްރޭޝަންގެ ރިކް ސްޕިންރަޑް ވިދާޅުވެއެވެ.
އޭނާ ވިދާޅުވަނީ ކަނޑުގެ ސަތަހައިގެ ހޫނުކަމުގެ މިންވަރުން ދައްކައި ދެނީ އަނބުރާ ޖައްވަށް ދޫކުރާ ހޫނަސް ވުރެން މާ ބޮޑު މިންވަރެއް ކަނޑަށް ދަމައިގަންނަ ކަމުގެ ނިޝާނެއް ކަމަށެވެ. އެހެންވެ، ގްރީންހައުސް ގޭސްތަކުގެ ސަބަބުން ދުނިޔޭގެ ފަށަލައިގައި ތާށިވެފައިވާ އިތުރު ހޫނުގެ ބޮޑު ބައެއް ކަނޑުތަކުން ދަނީ ޖަހައިގަންނަމުންނެވެ.
ކަނޑު ހޫނުވުމަކީ މޫސުމާއި މޫސުމީ ހާލަތު ގޯސްވުމާ ގުޅިފައިވާ ކަމެކެވެ.
ދުނިޔޭގައި އެވްރެޖް ކޮށް ކަނޑުގެ ލޮނުގަނޑު ޖެހިޖެހިގެން 10 ވަނަ އަހަރަށް ރެކޯޑް މިންވަރަކަށް މައްޗަށް ގޮސްފައިވާ ކަންވެސް ފާހަގަވެފައި ވެއެވެ.
އެވްރެޖްކޮށް ދުނިޔޭގެ ކަނޑުގެ ލޮނުގަނޑު ހުންނަ މިންވަރު ރެކޯޑް ކުރަން ފަށާފައި ވަނީ ސެތެލައިޓް ބޭނުންކޮށްގެން 1993ވަނަ އަހަރުން ފެށިގެންނެވެ. އެއަށްފަހު2021 ވަނަ އަހަރު ގާތްގަނޑަކަށް 3.8 އިންޗި މަތިވެފައިވާ ކަމަށް ދައްކައެވެ.
1800 ގެ އަހަރުތަކުން ފެށިގެން ފިނި ހޫނުމިން ބެލެން ފެށި ހިސާބުން މިހާތަނަށް އައި އިރު މިފަހުން ކޮންމެ އަހަރަކުވެސް ކުރީ އަހަރަށް ވުރެން ދުނިޔެ ހޫނުވަމުންދާ ކަމަށް ރިކޯޑް ކުރެވިފައި ވެއެވެ.
ފާއިތުވި ހަތް އަހަރަކީ (2015–2021) ދުނިޔޭގައި މިހާތަނަށް ރެކޯޑްކުރެވުނު އެންމެ ހޫނު ހަތް އަހަރެވެ.
މި އަހަރު ފެނިގެން މިދަނީ 1000 އަހަރުގެ ތެރޭގައި ނުފެންނަ ފަދަ ފެންބޮޑުވުމާއި، ހަނަފަސްކަމާއި އަދި ތާރީޚީ ގޮތުން ހޫނުކަމެކެވެ. އޭގެ ސަބަބުން ގިނަ މުޖުތަމައުތަކަށް ގެއްލުން ލިބިފައިވާއިރު، މިކަމުން ދޭހަވަނީ މޫސުމީ ވަބާއަކީ ކުރިއަށް އޮތްތަނުގައި ކުރިމަތިލާން ޖެހޭނެ ނުރައްކަލެއް ކަމަށެވެ.
