ނިއުދިއްލީގައި އަންނަ ހަފްތާގައި އެމެރިކާ، ޖަޕާން އަދި އޮސްޓްރޭލިއާއާ ގުޅިގެން ބާއްވާ ކުއޯޑް ގްރޫޕްގެ މަސްއޫލުވެރިންގެ ރަސްމީ ފެންވަރުގެ ބައްދަލުވުމެއް ބާއްވާނެއެވެ. މިއީ ޓައިވާނާ ދެކޅަށް ޗައިނާއިން އަސްކަރީ ތަމްރީންތައް ފެށިފަހުން މި ގްރޫޕުގެ މަސްއޫލުވެރިންގެ ބަޔަކު ބާއްވާ މިފަދަ ފުރަތަމަ އިސް ވެރިންގެ ފެންވަރުގެ ބައްދަލުވުމެވެ.
ސެޕްޓެމްބަރު މަހުގެ 5ން 6ށް ބޭއްވުމަށް ހަމަޖެހިފައިވާ ކުއަޑްގެ ބައްދަލުވުމަކީ، އުޒްބެކިސްތާނުގައި ބާއްވާ ޝެންހައި ސެކިއުރިޓީ އޮގަނައިޒޭޝަންގެ ސަމިޓުގެ ކުރިން އިންޑިއާ ސަރުކާރުން ސިޔާސަތު ބެލެންސް ކުރުމަށް އަޅާ ފިޔަވަޅުތަކުގެ ތެރެއިން އިންޑިއާ އާއި އިންޑޯ ޕެސިފިކް ޕާޓްނަރުންނާ ދެމެދު ބާއްވާ ގިނަ ބައްދަލުވުންތަކުގެ ތެރެއިން އެއް ބައްދަލުވުމެވެ.
އިންޑިއާ ބޮޑުވަޒީރު ނަރެންދުރަ މޯދީ އެސްސީއޯ ސަމިޓުގައި ރަޝިޔާ، ޗައިނާ، ޕާކިސްތާން، މެދުތެރޭ އޭޝިއާ އަދި އީރާނުގެ ލީޑަރުންނާއެކު ބައިވެރިވެވަޑައިގަންނަވާނެއެވެ.
މިއީ ކޮވިޑްގެ ވަބާއާއި ޔޫކްރޭން ހަނގުރާމަ ފެށުނު ފަހުން ބާއްވާ މިފަދަ ފުރަތަމަ އިންޕާސަން ސަމިޓެވެ.
އިންޑިއާގެ ޚާރިޖިއްޔާގެ މަސްއޫލުވެރިން ކުއަޑް ބައްދަލުވުމަށް ފަހު ދެން އޮންނާނީ އިންޑިއާއާއި އެމެރިކާގެ 2+2 ބައްދަލު ވުމެވެ. އަދި އޭގެ ކުރިން ޓޯކިޔޯގައި އިންޑިއާގެ ޚާރިޖީ ވަޒީރާއި ދިފާއީ ވަޒީރުވެސް އެގައުމުގެ ޚާރިޖީ އަދި ދިފާއި ވަޒީރުންނާ 2+2 މީޓިންގއެއްގައި ބައިވެރިވެ ވަޑައިގަންނަވާނެއެވެ.
ހޯމައާއި އަންގާރައިގައި ނިއުދިއްލީގައި އޮންނަ ބައްދަލުވުމުގައި މިއަހަރުގެ މެއި މަހު ޓޯކިޔޯގައި ބޭއްވި ކުއަޑް ސަމިޓުގައި މަޝްވަރާ ކޮށްފައިވާ ކަންތައްތައް ކުރިއަށްދާ ގޮތް މުރާޖައާ ކުރާނެއެވެ.
އިންޑިއާ އާއި ޖަޕާނުގެ ބައްދަލުވުމަށް ފަހު އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖަޔަޝަންކަރުއާއި އިންޑިއާގެ ކޮމާސް މިނިސްޓަރު ޕީޔޫޝް ގޮޔަލް އެމެރިކާއަށް ދަތުރުކުރައްވާނީ ދެ ގައުމުގެ ވިޔަފާރީގެ މަޝްވަރާތަކަށެވެ. އެ ބައްދަލުވުން އޮންނާނީ ސެޕްޓެމްބަރު މަހުގެ 5ން 10ށް ލޮސް އެންޖެލިސްގައެވެ. އެއީ ތިންވަނަ އިންޑޯ ޕެސިފިކް އިކޮނޮމިކް ފޯރަމްގެ މިނިސްޓަރުގެ ބައްދަލުވުމުގެ ބައެކެވެ.
