އިންޑިއާގެ ދަރިވަރުންނަށް ދުނިޔޭގެ ފެންވަރުގައި ވާދަ ކުރެވޭ ގޮތަށް އިންޑިއާގެ ގައުމީ މަންހަޖުތައް ތަންފީޒު ކުރާނެ ކަމަށް އިންޑިއާ ސަރުކާރުން ބުނެއެވެ.
އިންޑިއާ ސަރުކާރުން ތައާރަފް ކޮށްފައިވާ ނޭޝަނަލް އެޑިއުކޭޝަން ޕޮލިސީ (އެންއީޕީ) 2020 ގެ ދަށުން އިންޑިއާގެ އެޑިއުކޭޝަން ޕޮލިސީ ކުރިއަށް އޮތް ދުވަސްތަކުގައި ގްލޯބަލް ބެންޗްމާކްސް އާ އެއް ހަމައަކަށް ބަދަލު ކުރުމަށް މަސައްކަތް ކުރާނެއެވެ.
އެޑިއުކޭޝަން ސަމިޓް، 2022 ގައި ވާހަކަ ދައްކަވަމުން އިންޑިއާގެ މިނިސްޓްރީ އޮފް ޕަރސަނަލް، ޕަބްލިކް ގްރީވެންސް އެންޑް ޕެންޝަންސް ޖީތެންދުރަ ސިންގ ވިދާޅުވީ ނޭޝަނަލް އެޑިއުކޭޝަން ޕޮލިސީއަކީ މިނިވަންކަމަށްފަހު އިންޑިއާގައި ތައުލީމީ ދާއިރާއަށް ގެނެވުނު އެންމެ ބޮޑު ބަދަލެވެ. އަދި އިންޑިއާގެ އައު ގައުމީ މަންހަޖުތައް ބައްޓަން ވެގެން ދާނީ 21 ވަނަ ގަރުނުގައި އިންޑިއާއަށް ބޭނުންވާ ބޭނުންތަކާއި ޝަރުތުތަކާ އެއްގޮތަށްކަމަށް އޭނާ ވިދާޅުވިއެވެ.
ސަރުކާރުން އަމާޒު ހިފާފައި ވަނީ ހަމައެކަނި ޑިގްރީތަކަށް ފޯކަސް ކުރުމަށް ވުރެ ބޮޑަށް ދަރިވަރުންގެ ހުނަރާއި ކުޅަދާނަކަމާއި މައުލޫމާތު މުއްސަނދިކޮށް ވާދަވެރި މާހައުލަކަށް ފެތޭ ގޮތަށް ދަރިވަރު ބައްޓަން ކުރާށެވެ. އަދި އެއާއެކު ދަރިވަރުންނަށް އެމީޙުންގެ އުނގެނުމުގައި އަމިއްލައަށް ކަންކަން ނިންމުމަށް އިޚުތިޔާރު ލިބޭނެކަމަށްވެސް އިންޑިއާ މިނިސްޓަރ ވިދާޅުވިއެވެ.
އައު އެޑިއުކޭޝަން ޕޮލިސީގައި އެކި ދިމަދިމާއިން ތައުލީމީ ނިޒާމަށް ކުދިންނަށް ވަދެވޭ ގޮތަށާއި ފަހުން އަނބުރައި އަންނަ ގޮތަށް ކިޔެވުން މެދު ކަނޑާލުމަށްވެސް ފަސޭހަ ވާގޮތަށް އިޚުތިޔާރުތައް ދީފައިވާނެއެވެ.
