ދުނިޔޭގައި ދުންފަތް އުފައްދާ އެންމެ ބޮޑު އެއް ކުންފުނި ކަމަށްވާ ޗައިނާ ނޭޝަނަލް ޓޮބޭކޯ ކޯޕަރޭޝަން (ސީއެންޓީސީ) އަކީ ދުނިޔޭގެ ދުންފަތުގެ ވިޔަފާރީގެ 44 ޕަސެންޓްގެ މާކެޓް ހިއްސާއެއް އޮންނަ ކުންފުންޏެކެވެ.
ޗައިނާއިން ދަނީ ދުނިޔޭގެ އެކި ގައުމުތަކުގައި ހަލުވިކަމާއެކު ދުންފަތުގެ ވިޔަފާރި ފަތުރަމުންނެވެ. ގާނޫނީ ގޮތުންނާއި ގާނޫނާ ހިލާފު ގޮތްތައް ވެސް ބޭނުން ކޮށްގެން އެކި ބައްރުތަކުގައި ޗައިނާގެ ދުންފަތުގެ ސިނާއަތު ޕްރޮމޯޓް ކުރަމުން ގެންދާ ކަމަށްވެސް މީޑިއާއިން ބުނެއެވެ.
އަދި ޗައިނާއިން ދަނީ އެގައުމުގެ ދުންފަތުގެ ވިޔަފާރި ކުރާ ދައުލަތުގެ ކުންފުނިތަކަށް ޗައިނާއިން ބޭރުގައި އިންވެސްޓްކޮށް ވިޔަފާރި ފުޅާކުރުމަށް ހިތްވަރު ދެމުންނެވެ. ނަތީޖާއެއްގެ ގޮތުން ޗައިނާގެ ދައުލަތުގެ އެކި ކުންފުނިތަކުން މިހާރު ގާތްގަނޑަކަށް 132 ގައުމަކާއި ސަރަހައްދެއްގައި މި ދާއިރާގެ އިންވެސްޓްމެންޓް ކަވަރުކުރެއެވެ.
އދ.އިން ބުނާ ގޮތުގައި ޗައިނާއަކީ ދުނިޔޭގެ ފޮރިން ޑައިރެކްޓް އިންވެސްޓްމެންޓް ބޭރުކުރުން 2.7 ބިލިއަން ޑޮލަރުން 84 ބިލިއަން ޑޮލަރަށް އިތުރު ކޮށްފައިވާ މުހިންމު މަސްދަރެކެވެ.
ޗައިނާގެ ދައުލަތުގެ އެހެން ކުންފުނިތަކުންވެސް ވަނީ ސީއެންޓީސީއާއެކު "ގޯ އޯލް އައުޓް" ސްޓްރެޓެޖީގައި ބައިވެރިވެފައެވެ.
މި ކުންފުނީގެ ވިޔަފާރި، މިހާރު ވަނީ 20 ގައުމަކަށް ފުޅާކޮށް އެގައުމުތަކުގައި، ސޭލްސް އޮފީސްތައް ހުޅުވައި 34 އޮފްޝޯ ފެސިލިޓީއެއް ހުޅުވާފައެވެ.
