ރާއްޖޭގައިވެސް ވާހެން ރައްޔިތުން ރަތްދަކާ އަވީގައި ތިބެގެން ވޯޓްލާފަހުން ކެންޔާގައިވެސް ނަތީޖާ ކަށަވަރުކޮށްދޭން ޖެހެނީ ސުޕްރީމް ކޯޓުންނެވެ. ކެންޔާގެ ރިއާސީ އިންތިޚާބަކީ ގައުމެއްގެ ބަޔަކަށް ފައިސާ ހޭދަކޮށްގެން ގަނެވޭނެ ދެފުށް ފެންނަ އެންމެ އަގު ބޮޑު އިންތިޚާބެވެ. ދެފުށް ފެންނަމުން ގޮސް ވަގުތުން ނަތީޖާވެސް އިއުލާން ވެގެން ދެއެވެ.
އެކަމަކު އޮގަސްޓް 15 ވަނަ ދުވަހު އިންތިޚާބު ކާމިޔާބު ކުރީ ވިލިއަމް ރޫޓޯކަން އިއުލާން ކުރުމުން އޭނާއާ ވާދަކުރި ރައިލާ އޮޑިންގާއަށް އެކަން ހަޖަމެއް ނުވިއެވެ. ރޫޓޯގެ ކާމިޔާބީއަކީ ވަރަށް ހަނި މާޖިންއެކެވެ.
އެފުރިކާގައި ބޭއްވި ނަމޫނާ އިންތިޚާބެއްކަމަށް ބުނެ ދުނިޔެއިން ތައުރީފް ކުރި އިންތިޚާބުގައި އިލެކްޝަން ކޮމިޝަންގެ ރައީސް ވޯޓު އޮޅުވާލި ކަމަށް ތުހުމަތު ކޮށްފައި ވެއެވެ.
މިއީ އުމުރުން 77 އަހަރުގެ ރައިލާ އޮޑިންގާ ރިއާސީ އިންތިޚާބުގައި ވާދަކުރާ ފަސްވަނަ ފަހަރެވެ. ފަސްވަނަ ނާކާމިބީއެވެ. އޭނާ ވަނީ މައްސަލަ ސުޕްރީމް ކޯޓަށް ވައްދާފައެވެ.
ހަތް ފަނޑިޔާރުންގެ ބެންޗުން މިދިޔަ ހަފްތާގައި ހޭލައި ތިބެގެން ބެލީ ކަރުދާހުގައި ޖަހާފައިވާ އެއްވެސް ފާހަގައެއް ކައްސާލައިގެން ގޮސްފައިވޭތޯ ބެލުމުގައެވެ.
މާދަމާ ހޯމަ ދުވަސް ނިމޭނީ މިމައްސަލާގައި ފަނޑިޔާރުން ނިޔާއެއް ކަނޑައަޅައިގެންނެވެ.
