އިމްރާން ޚާންގެ ޕާޓީއަށް ފައިސާ ޚަރަދު ކުރާ އަބްރާޖް ގްރޫޕްގެ ކުރީގެ ވެރިޔާ އާރިފް ނަގްވީ ޕާކިސްތާނަށް ލޯންޑާ ކޮށްފައިވާ ފައިސާގެ ތަހުގީގަށް ބަލާއިރު، ކުރީގެ ވެރިކަން ކުރި ތަހްރީކޭއިންސާފް ޕާޓީ (ޕީޓީއައި) ގެ މީޑިއާ ކެމްޕޭނަށް ބޭރު ލިބިފައިވާ ފައިސާގެ ބޮޑު އަދަދެއް ބޭނުން ކޮށްފައިވާކަން މިހާރު ހާމަވެއްޖެއެވެ. އަދި ޕީޓީއައިން އެކަން ކޮށްފައި ވަނީ 2013 ވަނަ އަހަރުގެ އާންމު އިންތިހާބުގެ ތެރޭގައެވެ.
ފެޑެރަލް އިންވެސްޓިގޭޝަން އެޖެންސީއަށް ލިބިފައިވާ ޑޮކިއުމެންޓްތަކުން އެނގޭ ގޮތުގައި 625،000 ޑޮލަރު ލޯންޑާކޮށްފައި ވެއެވެ. އަދި އެފައިސާ ފޮނުވާފައި ވަނީ ކޭމަން އައިލެންޑްސްގައި ރަޖިސްޓްރީކޮށްފައިވާ އޮފްޝޯ ކުންފުންޏެއް ކަމަށްވާ ވޫޓަން ކްރިކެޓް ލިމިޓެޑް މެދުވެރިކޮށެވެ. އަދި އެކަމާ ގުޅޭ އެއް ބިލިއަން ޑޮލަރުގެ ޝަރީއަތެއް މިހާރުވެސް އެމެރިކާގެ ކޯޓެއްގައި ހިނގަމުން ދެއެވެ.
ޕާކިސްތން އިލެކްޝަން ކޮމިޝަނުން ވަނީ ވޫޓަން ކުންފުނިން 2.12 މިލިއަން ޑޮލަރު ޕީޓީއަށް ލިބުނު ކަމަށް ޙުކުމް ކޮށްފައެވެ. އަދި މީޑިއާއަށް ހޭދަ ކޮށްފައިވާ ފައިސާއަކީ އޭގެ އިތުރުން ހޭދަކޮށްފައިވާ ފައިސާއެކެވެ.
ތަހުރީކޭ އިންސާޕް ޕާޓީއާ ގުޅިފައިވާ މަނާ ފައިސާއަކީ ދަ އިންސާފް ޓްރަސްޓް ނަމަކަށް ކިޔާ ހިލޭސާބަހަށް މަސައްކަތް ކުރާ ޓްރަސްޓެއް މެދުވެރކޮށްގެން ލޯންޑާ ކޯށްފައިވާ ފައިސާއެވެ.
އެ ޓްރަސްޓްގެ އިޢުލާންކުރި މަޤްޞަދުތަކުގައި، ޞިއްޙަތައި ތަޢުލީމާއި އިޖްތިމާޢީ ނިޒާމު ކުރިއެރުވުމަށް އެކި ގޮތްގޮތުން ހަރަކާތްތައް ހިންގުމުގެ އިތުރުން، ޑިމޮކްރަސީއާއި ޤާނޫނީ ވެރިކަން ޕްރޮމޯޓްކޮށް ސިޔާސީ ހޭލުންތެރިކަން މުޖުތަމަޢުގައި ކުރިއެރުވުންވެސް ހިމެނެއެވެ.
