ކެނެޑާގެ ހުޅަނގުގެ ސަސްކަޗެވާންގެ 13ތަނެއްގައި ހަރަކާތތެރިވެ 10 މީހަކަށް ވަޅިން ހަމަލާދިން ސިލްސިލާ ޖަރީމާގައި ކެނެޑާގެ ބޮޑުވަޒީރު ޖަސްޓިން ޓްރޫޑޯ ވަނީ ކަންބޮޑުވުން ފާޅުކުރައްވާފައެވެ. ޓްރޫޑޯ ވަނީ މިހާދިސާއަކީ ބިރުވެރި އަދި ހިތްދަތި ހާދިސާއެއް ކަމަށް ވިދާޅުވެ، ކަމާބެހޭ ފަރާތްތަކުން ހާލަތު ވަރަށް ގާތުން ބަލަމުންދާ ކަމަށް ވިދާޅުވެފަ އެވެ.
ފުލުހުން ބުނި ގޮތުގައި ވަޅިން ހަމަލާދިން ހާދިސާތައް ރިޕޯޓްކޮށްފައިވަނީ ޖޭމްސް ސްމިތު ކްރީ ނޭޝަން އާއި ސަސްކަޓަންގެ އިރުއުތުރުގައި އޮންނަ ވެލްޑަން އަވަށު ސަރަހައްދުގެ މަދުވެގެން ތަފާތު 13 ތަނެއްގައެވެ.
މިވަގުތު ކަމާބެހޭ ފަރާތްތަކުން ވަނީ ޝައްކުކުރެވޭ ދެ މީހަކު ކަމަށްވާ ޑޭމިއަން ސެންޑަރސަން އާއި މައިލްސް ސެންޑާސްގެ ފޮޓޯ އާންމުކޮށް، ރައްކާތެރިކަމުގެ ފިޔަވަޅެއްގެ ގޮތުން ގޭތެރޭގައި މަޑުކުރުމަށް ރައްޔިތުންނަށް އިންޒާރު ދީފަ އެވެ.
