ޕާޓްނަރޝިޕް ފޯ ގްލޯބަލް އިންފްރާސްޓްރަކްޗާ އެންޑް އިންވެސްޓްމަންޓް (ޕީޖީއައިއައި) ގެ ނަމުން ގްރޫޕް އޮފް ސެވަން (ޖީ7) ގެ ގައުމުތަކުން ޖޫން ވަނީ އައު ޕްރޮގްރާމެއް ކުރިއަށް ގެންދިއުމަށް ނިންމާފައެވެ.
މި ޕްރޮގްރާމަކީ ފަގީރު ގައުމުތަކުގެ ގުދުރަތީ މުއްސަދިކަން ފޭރި ގަތުމަށް އެ ގައުމުތަކަށް ބޮދެތި އަދަދުން ލޯނުދީ އިންފްރާސްޓްރަކްޗަރ ގާއިމް ކުރުމުގެ މަސައްކަތާ ދެކޮޅަށް އެހީތެރިވެދޭ ޕްރޮގްރާމެކެވެ.
އާމްދަނީ ދަށް އަދި މެދުފަންތީގެ ގައުމުތަކުގައި ފެންވަރު ރަނގަޅު އިންފްރާސްޓްރަކްޗަރ ބިނާކުރުމަށް ބޭނުންވާ މާލީ އަދި ފަންނީ ބޭނުންތައް ޕީޖީއައިއައި އިން އެހީވެދޭނެއެވެ. މި ހާތަނަށް މި ކަމުގައި ގައުމުގައި އިންވެސްޓް ކުރަމުން އައިސްފައިވަނީ ޗައިނާ ސަރުކާރުން ޗައިނާގެ ބެލްޓް އެންޑް ރޯޑް އިނިޝިއޭޓިވް (ބީއާރުއައި) ގެ ދަށުންނެވެ.
ޗައިނާގެ އިންވެސްޓްމެންޓް މައްސަލައަކަށްވެފައި ވަނީ ޔޫގެންޑާ އެއަރޕޯޓާއި ކެންޔާގެ ރެއިލްވޭއާއި ސްރީލަންކާގެ ހަމްބަންޓޯޓާ ބަނދަރާއި ޒެމްބިއާގެ އެއަރޕޯޓަށް ދިމާވި ފަދަ މައްސަލަތައް ކުރިމަތިވެގެން އިންޓަރނޭޜޝަނަލް މަނިޓަރީ ފަންޑުން ގައުމުތައް ދަރަނީގެ ވަކިތަކުން ސަލާމަތް ކޮށްދީ ގައުމުގެ އިސްތިގްލާލު ދެމެހެއްޓުމަށް މަސައްކަތް ކޮށްދޭން ޖެހުމުންނެވެ.
މަޝްރޫއުތަކާ ހިލާފަށް، ކުޑަ އަގެއްގައި، ދަރަނީގެ ލުއި މިންގަނޑުތަކެއް ގެންގުޅެ، އަވަސް ޓައިމްލައިނެއްގައި މަޝްރޫއުތައް ނިންމުމަކީ މި މަސައްކަތުގެ އަމާޒެކެވެ. އަދި ޕީޖީއައިއައިގެ އިސްނެގުމަކީ ދުނިޔޭގެ އާންމު އިގްތިސާދީ ހެޔޮ ދުޅަހެޔޮކަމާއި ދެމެހެއްޓެނިވި ތަރައްގީއަށް ބޮޑު ކާމިޔާބީއަކަށް ވެދާނެ އެވެ.
ސްރީލަންކާއާއި ޕާކިސްތާނުގެ ތަޖުރިބާތަކުން ދައްކާފައިވާ ފަދައިން ބީއާރުއައިގެ ލޯނުތަކުން އިންފްރާސްޓްރަކްޗަރ ބިނާކުރުމުގެ ސަބަބުން އެ ލޯނު ލިބޭ ގައުމުތައް ވަނީ ދަރަނީގެ ދަންތުރައިގައި ޖެހިފައެވެ.
ޕާކިސްތާންގައި ޗައިނާއިން ހިންގާ ޗައިނާ ޕާކިސްތާން އިކޮނޮމިކް ކޮރިޑޯ (ސީޕެކް)ގެ މަޝްރޫއަކީ ޕާކިސްތާންގެ އަރަބި ކަނޑަށް އޮންނަ ގަވަދާރު ބަނދަރުން ސީދާ ޗައިނާގެ ޝިންޖިއާންގެ ވެރިރަށް ކަޝްގަރަށް އޮންނަ ހައިވެއާ އާއެކު ހިމަނާފައިވާ މަޝްރޫއުތަކެވެ.
ދަރަނި ނުދެއްކިފައިވާ ކޮލަމްބޯ އާއި ދަރަނިން ސަލާމަތްވުމަށް ޕާކިސްތާން އިންޓަނޭޝަނަލް އެއަރ ލައިނާއި އެހެން ބައެއް ހަރުމުދާ ވިއްކުމަށް ނިންމާފައިވާ އިސްލާމްއާބާދަށް ވަނީ ބޮޑު ދަރަންޏެއްގެ ބުރައެއް އުފުލަން ޖެހިފައެވެ.
ދަރަނީގެ ބުރަ އުފުލަން ޖެހުމުގެ ސަބަބުން ގައުމުތަކުގެ އެތެރޭގެ ހާލަތު ހަލަބޮލި ވުމުން އެއީ ބައިނަލްއަގްވާމީ އަދި ސަރަހައްދީ ސަލާމަތީ މައްސަލައަކަށްވެސް ވެއެވެ. ލަންކާއަށް ސިޔާސީ ހަމަނުޖެހުންތަކާ ކުރިމަތިލާން ޖެހުމުން ކާބޯތަކެއްޗާއި ތެޔޮ އެތެރެ ނުކުރެވި އެންމެ ފަހުން ދަރަނި ނުދެއްކި، ސަރުކާރު ވެއްޓިގެން ދިޔައެވެ.
ބީއާރުއައި ލޯނުތަކަކީ ދެ ފުށްފެންނަ ޝަތުރުތަކާއެކު ކޮށްފައިވާ ލޯން އެއްބަސްވުންތަކެއް ނޫން ކަމަށް ބައިނަލްއަގްވާމީ މީޑިއާގައި ބުނެއެވެ.
ޖީ7ގެ ގައުމުތަކުން ބާރު އަޅަނީ އިންފްރާސްޓްރަކްޗާއަށް އެހީ ލިބޭ ގައުމުތަކުގައި މަސައްކަތްތެރިން ބާރުވެރިކުރާ ށެވެ. ޗައިނާއިން ހިންގާ މަޝްރޫއުތަކުގައި މަސައްކަތް ތެރިން ބާރުވެރި ކުރުމާއި ޓެކްނޮލޮޖީ ބަދަލު ކުރުމުގެ މަސައްކަތެއް ނުހިމެނެއެވެ. ޗައިނާގެ މަޝްރުއުތަކުގައި ގެންގުޅެނީ އެގައުމުގެ އަމިއްލަ ލޭބަރުންނެވެ.
ބީއާރްއައިގެ މަޝްރޫއުތަކުގެ ތެރޭން އެންމެ މަމއްސަލައަކށް ވެފައިވާ އެންމެ ފަހުގެ މަޝްރޫއަކީ ޕެރޫގައި ބަނދަރެއް ބިނާ ކުރުމަށް ކުރިއަށްދާ ޗަންކޭ މަލްޓިޕާޕަސް ޕޯޓް ޓާމިނަލް ޕްރޮޖެކްޓެވެ. މި މަސައްކަތުގައި ކަނޑާއި އެއްގަމުގެ ދިރުން ނައްތާލެވި، ގިނަ އަދަދެއްގެ ވިހަ ތަޣައްޔަރު މާއްދާތައް ބޭރުކޮށްފައިވާ ކަމަށް ތުހުމަތު ކުރެވެއެވެ. އަދި ލޯކަލް ކޮމިއުނިޓީތައް ގެދޮރު ދޫކޮށް ދިއުމަށް މަޖުބުރުވެފައި ވެއެވެ.
ޕާކިސްތާންގެ ގަވަދާރުގައިވެސް ބަލޫޗީން ދަނީ މެދު ނުކެނޑި ހަޅުތާލު ކުރަމުންނެވެ. ގަވަދާރު މަސްވެރިންގެ ޒަމާންވީ އާމްދަނީ ލިބޭ މަސްވެރިކަން ހުއްޓިފައި ވެއެވެ.
