އިނގިރޭސި ވެރިކަމުގެ ސަގާފަތާ އެއްގޮތަށް ބޮޑުވަޒީރު ބަދަލުވާނީ އިނގިރޭސި ދައުލަތުގެ ވެރިޔާ އަދި ދުސްތޫރީ ބާރު އޮންނަ ރާނީއަށް ބޮޑު ވަޒީރު އިސްތިއުފާ ދެއްވާނެ ކަން ދެންނެވުމުންނެވެ.
ބޮރިސް ޖޯންސަން ވަނީ ސްކޮޓްލެންޑަށް ވަޑައިގެން އޭނާ އިސްތިއުފާ ދެއްވިކަމަށް ރާނީއަށް ދަންނަވާފައެވެ. އަދި އެއަށްފހު ލިޒް ޓްރަސް ވަނީ އިނރޭސި ބޮޑުވަޒީރަކަށްވެ ވަޑައިގެން ސަރުކާރު އެކުލަވާލުމަށް ބޭނުންފުޅުވާކަމަށް ރާނީއަށް ދަންނަވާފައެވެ.
ޖޯންސަންގެ އިސްތިއުފާއާއި ޓްރަސްއާ މަގާމު ޙަވާލު ކުރެއްވުމުގެ އެވީ ވަގުތުކޮޅުގައި އިނގިރޭސިވިލާތުގެ އެގްޒެކްޓިވް ބާރުގެ ހުރިހައި ކަމެއް ބެލެހެއްޓެވީ ރާނީ އެލިޒަބަތުއެވެ.
އުމުރުފުޅުން 96 އަހަރުގެ ރާނީ ހުންނެވީ ސްކޮޓްލެންޑްގައި ޗުއްޓީގައެވެ.
ލިޒް ޓްރަސްއަކީ އެކައުންޓެންޓެކެވެ، އެކަމަނާ ސިޔާސީ މައިދާނަށް ވެންނެވީ ކޮންޒަވެޓިވް ޕާޓީއަށް އައު މޫނުތައް ހޯއްދެވުމަށް އެއިރުގެ ބޮޑު ވަޒީރު ޑޭވިޑް ކެމެރަން ކުރެއްވި މަސައްކަތްޕުޅުގައި 2010 ވަނަ އަހަރު ޕާލަމެންޓަށް ހޮވިވަޑައިގެންނެވެ.
ޓްރަސްއަކީ އަޑިގުޑަން ސިޔާސީ މައިދާނަކުން މަތީ މަގާމަށް ވަޑައިގަތް ކަނބަލެކެވެ. ބައެއް ފަހަރަށް ޕާޓީ މީހުންގެ ފަރާތުން މަލާމާތާއި ފުރައްސާރައާވެސް ކުރިމަތިލާން ޖެހިވަޑައިގަތެވެ.
އިނގިރޭސިވިލާތް ވިލާތު އިއްތިހާދުން ވަކިވާން 2016 ވަނަ އަހަރުގެ ފެންނަ ނުފެންނަ ވޯޓުގައި އެކަމަނާ މަސައްކަތް ކުރެއްވީ އިނގިރޭސިވިލާތް އިއްތިޙާދުގައި ބޭއްވުމަށެވެ.
ފަހުން ބްރެކްސިޓު ކާމިޔާބު ވުމުން އެކަމަނާ ވަނީ އެކަމަށްވެސް ތާއީދުކުރައްވައި ވިސްނުން ބަދަލު ކުރައްވާފައެވެ. ޓްރަސްއަކީ މާގްރެޓް ތެޗާގެ އިގްތިސާދީ ފަލްސަފާއަށް ތާއީދު ކުރައްވާ މިނިވަން މާކެޓްގެ އުސޫލުތައް ހަރުކަށިކަމާއެކު ދެމެހެއްޓެވުމަށް ވަކާލާތު ކުރައްވާ ބޭފުޅެކެވެ.
ޓްރަސްގެ ބޮޑު ވަޒީރުކަމުގައި ސިޔާސަތު އެކުލަވާލައްވާއިރު އިނގިރޭސިވިލާތުގައި އާންމު ރައްޔިތުން ފަގީރުވެ ބިކަ ވުމާއި ސަލާން ޖަހާ މީހުން އިތުރުވެ، ކަރަންޓު ބިލު ނުދެއްކުން ފަދަ މައްސަލަތަކަށް ޚާއްސަ ސަމާލުކަމެއް ދެއްވާނެއެވެ. އަދި ޓެކްސް ކުޑަކުރުމަށާއި ދިފާއީ ޚަރަދުތައް އިތުރުކުރުމަށް ކުރާ މަސައްކަތުގައި ބެލެންސެއް ގެންގުޅުއްވުމަކީ އެކަމަނާއަށް ކުރިމަތިވެ ވަޑައިގަންނަވާނެ ގޮން ޖެހުމެކެވެ.
އެހެނިހެން ގޮންޖެހުންތަކުގެ ތެރޭގައި ސްކޮޓްލޭންޑްގެ މިނިވަންކަމާ ބެހޭ ގޮތުން ދެވަނަ ފަހަރަށް ނަގަން އުޅޭ ޚިޔާލު ހޯދުމާއި، ބްރެކްސިޓްގެ ސަބަބުން އީޔޫއާ މެދު ހިނގަމުންދާ ނުތަނަވަސްކަން ކުޑަ ކުރުމާއި، އުތުރު އަޔަލޭންޑުގައި އުފެދިފައިވާ ސިޔާސީ ހަލަބޮލިކަމަށް ހައްލެއް ހޯދުން ދާޚިލީ ސިޔާސަތުގެ ތެރޭގައި ހިމެނެއެވެ.
ޚާރިޖީ ސިޔާސަތުގައި އެކަމަނާ އިސްކަންދެއްވާނީ ޔޫކްރޭނަށް ތާއީދު ކުރުމާއި (ޕޫޓިންއާ ދެކޮޅު ހެދުމާއި) އަދި ދުވަހެއް ދުވަހަކަށް ވަރުގަދަވަމުން އަންނަ ޗައިނާއަށް ރައްދު ދިނުމުގެ މަސައްކަތުގައެވެ.
މި ހުރިހައި ކަމެއްގެ އިތުރުން ބާރުގަދަވެ މަގްބޫލުވަމުން އަންނަ ލޭބާ ޕާޓީއާ ދެކޮޅަށް އެކަމަނާގެ ޕާޓީ ވަރުގަދަ ކުރުމަކީވެސް ކުރިމަތި ލައްވަން ޖެހޭނ ގޮން ޖެހުމެކެވެ.
ސުއާލަކީ ދެން ބޮރިސް ޖޯންސަން މަހަށް ވަޑައިގަންނަވާނީ ތޯއެވެ؟ ނޫނެކެވެ! އޭނާ އެނބުރި އިސް މަގާމަށް ވަޑައިގަތުމަކީ އަދިވެސް އޮތް ކަމެކެވެ.
ތުރުކީގެ އެންމެ ފަހުގެ އުސްމާނީ ޚަލީފާގެ ދާޚިލީ ވަޒީރުގެ ކާފަ ދަރިފުޅު ދެން ހަރަކާތްތެރިވެ ވަޑައިގަންނަވާނީ ނޫސްވެރިކަމާއި ތަގްރީރު ކުރެއްވުމުގައެވެ.
މަގާމުން ވަކިވެ ވަޑަގަތުމަށް ދެއްވި އެންމެ ފަހު ތަގްރީރުގައި ޖޯންސަން ވިދާޅުވީ، މީލާދީން 519-438 ގައި އުޅުއްވި ރޯމަން ސިޔާސީ ލީޑަރު ލޫސިއަސް ކުއިންކްޓިއަސް ސިންސިނަޓަސް އެނބުރި ސިޔާސީ މައިދާނަށް ވަޑައިގަތް ކަމަށެވެ. މާނައަކީ އޭނާ މަގާމުން ދުރުވެ ވަޑައިގެން ދަނޑުވެރިކަމުގައި އުޅުއްވުމަށްފަހު އެނބުރި ޑިކްޓޭޓަރެއްގެ ގޮތުގައި ރޯމަނުންގެ ވެރިއަކަށް ވަޑައިގަތް ވާހަކައެވެ. ޖޯންސަންއަށްވެސް އެފަދަ ފުރުސަތެއް އޮތް ކަމަށެވެ.
ޖޯންސަންއަކީ މަގްބޫލު ބޭފުޅެކެވެ. ނަމަވެސް އޭނާގެ އަޚްލާގީ ކޮރަޕްޓް މައްސަލަތަކާ ހެދި ގާތް ބޭފުޅުން އޭނާ ދޫކޮށް ވަޑައިގަތުމުން ތާއީދު ގެއްލުނީއެވެ.
